صاحب سوبرماركت بالبدرشين يعترف: بعنا تمثال مزيف لسعودي بـ 4.5 مليون جنيه
أدلى المتهم ماهر العزب 52 سنة صاحب سوبر ماركت، باعترافات تفصيلية في القضية المتهم فيها بالاشتراك مع آخرين في تشكيل عصابي المعروف بتشكيل جينجا بمنطقة البدرشين، تخصص في النصب والسرقة بالإكراه، بعد قيامهم باستدراج مواطن، وإيهامه بإمكانية تغيير مبلغ 4 ملايين و 850 ألف جنيه من العملة المحلية إلى الدولار، وبعدما وصل إلى الفيلا التي استدرجوه إليها، أخذوا منه المبلغ وفروا هاربين، إلا أن رجال المباحث تمكنوا من ضبطهم فورا.
السفير وتمثال مضروب
كشف العزب في التحقيقات عن معرفته بشخص يدعى إيهاب طاحون وشهرته السفير الذي يعرفه قائلا" ساعات كنت بحضر معاه جلسات بيع آثار و حضرت معاه قبل كدة جلسة بيع زيبق أحمر و هو بيعمل دور إنه خبير آثار و بيعرف اذا كانت القطعة سليمة ولا مضروبة و كنت بسترزق وأطلع بأي مصلحة وهو عرفني علي واحد اسمه محمد محمد خلف الله و بعد كدة لقيته بيقولي انه يعرف واحد سعودي اسمه أبو فهد عايز يشتري حته آثار و بيسألني اذا كنت اعرف أجيبله قطعة و انا قولتله انا عندي قطعة تقليد و بعد كدة هو وافق يجي يشوفها عندي في البيت وجيه معاه السفير ولما شافها اتفق معايا إنه هياخدها مني بمبلغ ٤,٥ مليون جنيه بس هو هيبلغ أبو فهد بمبلغ ۱۰ مليون جنيه و ياخد الباقي لنفسه وأنا قولتله ماشي و بعد كدة حددت معاه مقابلة في بيت السفير يوم ٥ / ۱۲ / ۲۰۲۳ الساعة ١:٠٠ مساءً علشان أبو فهد يجي علشان يشوف التمثال بس انا مجبتش التمثال معايا و ده كان بالاتفاق مع محمد خلف الله واتفقت مع أبو فهد علي مبلغ ۱۰ مليون جنيه و بعدين أبو فهد قال لمحمد انه عنده مشوار و هيمشي و قال لمحمد انه هيبعتله الفلوس وهو يخلص في التمثال و بعد كدة اتفقت مع محمد علي ميعاد عندي في الفيلا اللي انا مأجرها في منطقة الريف العربي يوم ۵ / ۱۲ / ۲۰۲۳ الساعة ٩:٠٠ مساءً و انا كلمت عمرو و قولتله انا عايز ٥ رجالة يأمنونا في المعاد ده وفعلا هو كلم اللي اسمه عمر وجاب الناس علشان تأمن المعاد و أنا بعد كدة لقيت السفير و محمد خلف الله جایين و قعدنا و اخدت مبلغ ٤,٥ مليون جنيه من محمد خلف الله و بعد كدة محمد اخد التمثال ومشي وأنا بدأت أوزع الفلوس علي الناس اللي معايا و أنا أخدت منهم ۲ ملیون و ۸۰۰ الف و ادیت عمر ۲۰ الف جنيه و اديت مني ۹۰۰ الف جنيه و اديت عمرو ۷۰۰ الف جنيه و انا في البيت عند عمرو علشان أديه الفلوس لقيت الحكومة طبت علينا و فتشوني و فتشوا البيت و اخدوا كل الفلوس والدهب اللي في البيت عند عمرو واخدوني معاه علي عربية ميكروباص وودونا علي المركز وجابونا على النيابة وده كل اللي حصل.
تمثال مضروب بـ 12 ألف جنيه
استطرد المتهم في التحقيقات التي باشرتها النيابة العامة معترفا بقيامه بتكليف أحد الأشخاص في منطقة خان الخليلي بعمل قطعتين مقابل 12 ألف جنيه للقطعة، مشيرا إلى أنه يعرف أن سعر القطعة في السوق 50 أل جنيه، وأن سبب شرائهما لمعرفته أن العاملين في الجيبسن بورد يستخدمونها في عملهم ولكي يستفيد من فارق السعر.
تمثال مضروب.. أوهمناه إنه أصلي
أوضح المتهم في التحقيقات أنه قام بالاشتراك مع شخص يدعى محمد خلف على بيعها للسعودي على أنها قطعة آثار أصلية، والموضوع كله كنت عايزه يتم لأنه من أوله لآخره نصباية على أبو فهد.
ذكر المتهم في التحقيقات أن المدعو محمد خلف استطاع الحصول من أبو فهد السعودي على مبلغ 10 ملايين جنيه وأنه أعطاهم بإرادته مبلغ 4.5 مليون جنيه، وأخذ التمثال المضروب، بينما قام هو بتوزيع المبلغ على المتعاونين معه في مشروعه الإجرامي، وهم منى الليثي والتي تعرف عليها صدفة في كافيه بمنطقة شبرا الخيمة، وأن حضورها كان للقيام بعمل شاي وقهوة وأن تقوم على خدمتنا، وأن نصيبها كان 900 ألف جنيه لزوم الفرفشة!!، إلا أن رجال الشرطة قاموا بضبطنا بعد قيام أبو فهد بإبلاغهم.
وجهت النيابة له تهم القيام باستدراج المجني عليه محمد خلف إلى فيلا والاستيلاء منه على المبلغ الخاص به، فأنكرها.
