كواليس خداع صاحب محل مصوغات ذهبية والاستيلاء منه على حوالي 5 مليون

كشف محمد خلف الله صاحب محل خير أمة للمصوغات الذهبية، في تحقيقات النيابة العامة، تفاصيل دقيقة حول واقعة استدراجه والنصب عليه وسرقة 4.85 مليون جنيه منه.

قال خلف الله" اللي حصل إني تاجر دهب و بحتاج الدولار في شغلي علشان أجيب بيه الدهب و أنا أعرف واحد اسمه السفير  إيهاب طاحون و هو سفير سابق لمصر في كوريا وقالي انه يعرف حد شغال تبع السفارة الألمانية و يقدر يجبلي دولار بايصالات رسمية عن طريق الصرافة وبعد كدة قابلت الراجل ده يوم الاثنين ٢٠٢٣/١٢/٤ في البيت عند السفير و كان معاه السكرتيرة وعرفت ان اسمه الدكتور ماهر عزب و قاللي إنه يقدر يوفر ليا دولار بأقل من سعر السوق السوداء بس محددليش السعر للدولار هيكون كام بالضبط علشان السعر بيتغير كل شوية و انا وافقت و اتفقت معاه اني هجبله فلوس مصري و هيديني قصادها دولار بشرط وجود إيصال رسمي للدولار و ثاني يوم ٥ / ١٢ / ٢٠٢٣ الساعة ١:٠٠ مساءً تقريبا قابلتهم تاني عند السفير في البيت و الدكتور ماهر قال انتم لازم تقضوا معايا اليوم في الفيلا عندي في الريف العربي علشان انا مجبتش الدولارات معايا و انا برضه مكنتش جيبت الفلوس المصري معايا علي أساس اني بس اتأكد ان الراجل ده مش نصاب وبعد كدة ماهر عزب مشي و انا بعت السواق بتاعي يجيب الفلوس من الإسماعيلية و بعد لما جهزت الفلوس نزلت أنا والسفير ومعايا الفلوس و هي مبلغ ٤,٨٥ مليون جنيه و السفير كلم ماهر عزب في التليفون و قاللي هستناك عند فندق كتاركت في شبرامنت و بعد لما وصلنا قابلناه بالعربية و هو مشي قدام مننا علشان يدلنا على المكان و بعد لما وصلنا لقيته نزل و رحب بينا و قالنا اتفضلوا في الفيلا بتاعتي ولقيت السكرتيرة بتاعته بتستقبلنا و طلعنا الدور اللي فوق و بعد كدة قاللي هات الفلوس و نزلت جبت الفلوس وحطيتها في الدور اللي تحت وماهر نزل و قاللي تعالي اتفضل معانا فوق عبال لما السكرتيرة تعد الفلوس و تجهز الإيصالات وبعد كدة انا طلعت و سمعت صوت عربية ونزلت أشوف في ايه وملقتش الكرتونة بتاعتي اللي كان فيها الفلوس و بعد كدة ماهر قاللي اهدي بس مفيش حاجة وبعد كدة سمعت صوت مبدية على السلم وناس طلعة عاملة نفسهم ضباط و معاهم سلاح وهربوا ماهر عزب و صوروني فيديو و لقيت واحد منهم مطلع حتة آثار و بيقول انت بتاجر في الآثار و بعد كدة حاولت اقاوم معاهم وبعد كدة سابوني أنزل وركبت العربية أنا و السفير و السواق و روحت علي البيت عند السفير و رحت علي المركز انا والسفير وعملت محضر و ده كل اللي حصل.

دور المتهمة منى الليثي

كشف صاحب محل خير أمة للمصوغات الذهبية، عن دور المتهمة منى الليثي قائلا" كانت بتستقبلنا ولابسه لبس قصير وشياكة وهي اللي كانت المفروض تاخد الفلوس وتجهز الإيصالات وإن اللي كان بيقدم المشروبات شاب صغير.
أوضح محمد خلف أنه عندما توجه لمشاهدة كرتونة الأموال فوجئ بالمتهم ماهر يطمئنه ما فيش حاجه أهدى، وبعدها سمع صوت دبدبة على السلم وناس طالعة عاملين نفسهم ضباط ومعاهم سلاح، وكان عددهم حوالي 10 أشخاص، وكل واحد كان معاه طبنجة بريتا وواحد كان معاه مسدس كبير، وكان فيه واحد منهم معاه جهاز لاسلكي وأنا عرفت على طول إنهم مش شرطة، لأنهم هربوا معاهم ماهر عزب، وهما لو كانوا شرطة، كانوا مسكوه هو كمان، بجانب إنهم صوروني فيديو ولقيت واحد منهم مطلع حتى آثار وبيقول إنت بتاجر في الآثار، وأنا ماليش علاقة ولا صلة بالآثار وكنت أول مرة أشوفها ساعة لما حد منهم طلعها قدامي ساعة لما كانوا بيصوروني فيديو، وأنا حاولت أقاوم معاهم وبعد كده سابوني أنزل وركبت العربية أنا والسفير والسواق ورحت على البيت عند السفير ورحت على المركز أنا والسفير وعملنا محضر.