الجوادي يكشف لأول مرة أسباب رحيله عن النادي الأهلي
كشف خالد الجوادي مترجم مارسيل كولر المدير الفني للأهلي، عن الأسباب الحقيقية التي أدت إلى رحيله عن الأهلي، موضحًا أنه لم يندم على دفاعه عن كولر عبر مواقع التواصل الاجتماعي.
خالد الجوادي يوضح أسباب رحيله عن النادي الأهلي
وأوضح خلال استضافته في برنامج"هاتريك"، على قناة أون تايم سبورتس، أن المكتب الإعلامي كان يتواصل معه إذا وجدت مناسبة او بطولة لكي يكتب لهم عن الموقف معين بثلاث لغات الألمانية والإنجليزية والعربية ثم يرسل لهم الترجمة ليدرسوا مدى مناسبتها لهم أم لا.
وأكمل:"من ثلاث شهور أنا مقرر أني همشي ومش هكمل وقلت لكولر كدا لأني عندي أسباب خاصة بعائلتي وكمان بقالي سنتين عايش بعيد عنهم والموقف أصبح صعب جدًا ومكلف ومرهق جدًا، وأيضًا السبب التاني حسيت أن الأجواء أصبحت مش أحسن حاجة وفيه انتقادات اتقالت، ومن وجهة نظري كانت ظالمة والكلمة اللى ترددت كتير إني بتعدى اختصاصاتي وعلشان كدا قررت عدم الاستمرار في النادي الاهلي، وأنا اري إنه اختصاصي ولكن النادي الأهلي لم يوضح في بيان رسمي إني مساعد كولر وأنا مش هعلن حاجه لم يتم الإعلان عنها".
وأردف:"فبسبب ذلك طلبت الرحيل ولكن كولر كان رافض تمامًا ومتمسك بيا قوي ولكن انا حسيت مع الضغوطات والكلام السئ والتسريبات، وإن الإدارة بدأت تشيل مني والموقف بقى محرج فقررت أرفع الحرج عن الجميع وكمان لقيت والناس مش مبسوطة بوجودي".
وتابع:" أنا شايف إني قمت بدور حلو في سنتين مع كولر وفهمته الثقافة المصرية وجمهور الأهلي والأجواء حوله ولذلك في استطاعته إنه يكمل مع مترجم تاني وبكده فاهم الدنيا ماشية إزاي، وبالتالي تمت استقالتي ولم يُقيلني النادي، وتقديم الاستقالة كان بعد المقاولين وقبل سموحة، مشيرًا أنا حبيت كابتن الخطيب من قلبي وأكن له الإحترام وحبيت الكرة علشانه وكمان بحبه على المستوى الشخصي".
تصريحات الجوادي بخصوص ماتش سموحة
وأضاف أيضًا تصريحات بخصوص ماتش سموحة: "قبل ماتش سموحة لقيت الجمهور بيهتف لكولر وبعدها بيهتفلي ودي حاجة أول مرة تحصل إن مترجم يتهتف له سألت كولر أعمل ايه قالي شاور للجمهور وانت في مكانك بس متروحش وعملت كدا ولاحظت بعدها إن الجمهور مهتفش ومشجعش حد من اللاعيبة واستغربت حاجه زي دي بعد الماتش كان فيه زحمة ومكنتش شايف كولر فتوقعت إنه راح للجمهور يجيه لأنه دايما بيعمل كده بعد أي بطولة".
وقال:" فروحت ناحية الجمهور أشوف كولر وكنت عمال أسأل كولر فين سألت المصورين اللاعيبة فين فعرفت إنهم دخلوا أوضة اللبس ولقيت الجمهور بيهتفلي فحييتهم وصعب عليا انهم جايين سفر بالساعات وأغلبهم من القاهرة ومحافظات وحتى لو في كام فرد خرج عن النص لكن في النهاية ده جمهور الأهلي ومن حقه يفرح و يحتفل ومينفعش إنك تقرر تعاقب الجمهور كله ولما دخلت اللبس قابلت كابتن محمد الشناوي قلتله هو انتو مش هتحتفلوا؟ قالي مااحنا بنحتفل أهو. قلتله لا أقصد مش هتحتفلوا مع الجمهور؟ قالي لا طبعاً فيه ناس تجاوزت ضد كهربا وعبد المنعم ومش هينفع نحتفل معاهم قلتله تمام وأنا قبل الماتش مكنتش سمعت التجاوز ده".
