نص اعترافات روماني.. خلص على خالته وزوجها وشرب الشاي وسرقهم

اعترافات تفصيلية أدلى بها المتهم روماني وكيم 40 سنة في التحقيقات التي باشرها محمود وائل وكيل نيابة العمرانية قائلا "أنا من مركز ببا ببني سويف، وكنت عايش في البلد من ساعة ما اتولدت وشغال فيها وفي سنة 2010 سيبت بني سويف وجيت القاهرة وسكنت في الخصوص مع أمي واخواتي واشتغلت في المقاولات وأنا ما فيش حد من أهلي كلهم عايش في القاهرة غير خالتي ثريا اسكندر، فأنا كنت متعود كل فترة أروح أزورها واطمن عليها وأقعد معاها وأشوف لو محتاجة حاجه وكنت بعاملها زي أمي وكنت ساعات ببات معاها هي وجوزها مكرم سدراك، ومن خمس شهور أنا أديت خالتي ثريا مبلغ 100 ألف جنيه كنت محوشهم وقلت لها سيبيهم عندك وشيليهوملي معاكي، وبعد كده من حوالي أسبوعين طلبت من خالتي وجوزها الفلوس فقالولي ما لكش حاجة عندنا وشتموني وطردوني من البيت وقالولي متجيش هنا تاني، فأنا مشيت وخدت الموضوع على كرامتي وقولت مش أنا اللي ينضحك عليا، وقررت إني أروح لجوز خالتي عشان أكلمه راجل لراجل وأقول له مينفعش يضحك عليا ويديني هو وخالتي الفلوس بتاعتي.

توجهت لزوج خالتي يوم الثلاثاء 2 مايو 2023 بالليل وقابلته واتكلمت معاه وقلت له أنا عايز فلوسي فقالي أنا مليش دعوة بالموضوع دا وكلامك مع خالتك هي اللي خدت منك الفلوس، فأنا ساعتها بيني وبين نفسي قررت إني أقتل جوز خالتي وخالتي هشان اخد فلوسي منهم ورحت قلت لزوج خالتي خلاص اللي تشوفه وطلبت منه إني أخذ مفتاخ مدخل باب البيت وأخليه معايا وقلت له ساعتها عشان أنا عندي مشوار وهغيب يوم يومين كده وهاجي فأخلي  المفتاح معايا وهو ساعتها وافق وأداني المفتاح ورحت أنا مشيت وروحت البيت وقررت إني أروح لجوز خالتي البيت يوم الجمعة 5 مايو 2023 وقت العصر تقريبا أديه الأمان وأقتله يوم السبت.

تحديد يوم التنفيذ

 وبالفعل أنا رحت له البيت يوم الجمعة وقضيت معاه اليوم كله وبيتنا مع بعض ويوم السبت الصبح صحينا أنا وهو وفطرنا واتغدينا مع بعض وقضينا اليوم كله مع بعض وعلى الساعة 10:30 مساء أنا وهو قاعدين نتفرج على التلفزيون اللى في الصالة أنا قمت ودخلت المطبخ وجيبت سكينة وخبيتها ورا ضهري وطلعت من المطبخ وقلت له يا عم مكرم تعالى عايز في موضوع في الأوضة فهو قام ودخل الأوضة وأنا دخلت وراه وأول ما دخل الأوضة فنديته فلف جسمه واداني وشه فضربته بالسكين في بطنه وزقيته على السرير وساعتها لقيت بالصدفة حتة قماشة بتاعت تنظيف موجودة فوق الغسالة اللي في غرفة النوم اللي احنا فيها رحت خدتها ولفيتها على رقبته وربطها عقدة واحدة وفضلت أعصر بيها على رقبته وبعديها جيبت السكينة تاني وضربته بيها عدة ضربات في مناطق مختلفة من جسده عشان أتأكد إنه مات، وبعد ما تأكدت إنه مات رحت فتشت في الشقة على فلوس لحد ما لقيت صندوق خشب مقفول بالقفل رحت كسرت القفل ولقيت في الصندوق فلوس 4000 جنيه فأخدتهم وخدت الموبايل بتاع عم مكرم وحطيتهم في جيبي وبعد كده جيبت كيس بلاستيك من الشقة وحطيت فيه أكياس وأطباق أكل اللى احنا كنا بناكل فيها عشان ابقى أرميها وبعدها خدت مفتاح الشقة وطلعت من الشقة وقفلتها بالمفتاح ومشيت ورميت الكيس البلاستيك في عربة زبالة في الشارع وبعديها روحت البيت في الخصوص ريحت شوية ونزلت من البيت تاني يوم ورحت على بيت خالتي تاني وطلعت الشقة عملت كباية شاي وشربت سيجارتين وكنت مستنيها حوالي ساعتين ترجع من شغلها، وساعتها كنت خبيت السكينة اللى قتلت بيها عم مكرم في الكنبة اللى في الصالة وفضلت مستنيها لحد ما لقتها بتفتح الباب رحت قابلتها وهي قالتلي انت بتعمل أيه هنا رحت كلت بعقلها حلاوة وهديت معاها وقولتلها انتى خالتي زي أمي واقعدي نتكلم بالعقل ورحنا قعدنا في الأنتريه وقولتلها انتي زي أمي المفروس تديني فلوسي ومينفعش الحاجات دي فقالتلي ما لكش حاجه عندي فقلت لها يعني ده آخر كلام ومش هتجيبي فلوسي قالت لي أيوه رحت طلعت السكينة وقمت عليها ضربتها ضربة بالسكينة في بطنها وصدرها لقيتها ما وقعتش وقامت من على الكنبة ومسكت فيا وخربشتني في وشي قمت فضلت أضرب فيها لحد ما وقعت على الأرض وبعد ما تأكدت من وفاتها قمت قلعتها الخاتم والدبلة والحلق الذهب بتوعها وخدت الموبايل بتاعها وحطيتهم في جيب بنطلوني وبعد كده عملت كوباية شاي وشربتها وروحت وبعد كده رميت السكين وكوباية الشاي، وبعدها روحت استحميت ونمتلي شوية وصحيت لبست ونزلت بعت الذهب وبعدها جاتلي فكرة إني أولع في البيت عشان ما حدش يعرف ايه اللي حصل وبعدها اشتريت جاز بـ 15 جنيه وولعت فيهم في الشقة.