انفراد..اعترافات قاتل سائق ان درايفر: مشي في طريق غلط وعافر معانا

ينفرد موقع خلف الحدث بنشر التحقيقات في واقعة قتل سائق ان درايفر أثناء قيامه بتوصيل شخصين، من منطقة حديقة بدر بجسر السويس إلى منطقة أم بيومي بشبرا الخيمة بالقليوبية، وأثناء محاولتهما سرقته بالإكراه، لم يستجب لهما في الطريق فأطلق عليه أحدهما عيارا ناريا، بينما ساعده الثاني في تهديده بمطواه والقياه في الطريق، وسرقوا أمواله وهاتفه المحمول وسيارته وفرا هاربين، وبعد أقل من 48 ساعة تمكن رجال مباحث القليوبية من ضبطهما.

 اعترافات تفصيلة أدلى بها المتهم اسلام عماد خطاب 30 سنة سائق مقيم بالمرج بالقاهرة في التحقيقات التي باشرها أحمد سامي وكيل نيابة قليوب بجنوب بنها في واقعة التخلص من سائق ان درايفر محمد عصام عمدا مع سبق الإصرار بالاشتراك مع صديقه أحمد عبد المنعم عمر 26 سنة سائق مقيم بمنطقة شبرا الخيمة.

"اعترافات"

قال المتهم اسلام خطاب في تحقيقات النيابة العامة، إن اللي حصل إنه وصديقه أحمد عبد المنعم عمر كنا واقفين في شارع جسر السويس عند حديقة بدر يوم 6 ابريل 2023 الساعة 8 مساء مستنيين عربية ملاكي طلبناها من تطبيق "إن درايفر" على تليفون وكنا متوجهين لناحية عزبة أم بيومي – بشبرا الخيمة وساعتها نزلنا نزلة قليوب بالغلط وكنت متفق أنا و احمد عبدالمنعم  علي إننا نثبت المجني عليه سواق "ان درايفر" وأنا ساعتها كان معايا سلاح أبيض "مطواه قرن غزال" كنت شايلها في جيبي اليمين وكنت ساعتها لابس جاكت أسود وأنا كنت راكب جنب المجني عليه وأحمد عبدالمنعم ركب ورا وأحمد عبدالمنعم كان معاه السلاح الناري "فرد خرطوش" حاطه في شنطة هدايا وكان قاعده بين الكرسيين اللي ورا في العربية وساعتها واحنا علي الدائري أنا طلعت المطواه من جيبي اليمين ومسكتها في أيدي وبزق المجني عليه وأحمد عبدالمنعم كان طلع الفرد الخرطوش من الشنطة اللي كانت في أيده ووجهوا في وش المجني عليه وقال له أقف أقف علي جنب والمجني عليه لما فضل ماشي بالعربية راح أحمد ضرب الطلقة من الفرد وجت في جنب المجني عليه وساعتها احنا فتحنا باب العربية وزقيناه من ناحية باب السواق اللي كان المجني عليه راكب فيه وأنا نطيت مكانه وسوقت العربية وجريت علشان الطريق كان زحمة وكان لازم نمشي بسرعة من الطريق لحد لما وصلنا عند ترعة الاسماعيلية عند طلعة كوبري السواح وسيبنا العربية هناك وقفلناها وأخدنا الرخص وتليفون المجني عليه ومشينا ورحنا علي بيت احمد عبدالمنعم عمر لحد لما لقينا المباحث امبارح السبت 8 ابريل 2023 الساعة 10 الصبح جم دخلوا علينا البيت وأخدونا علي المركز واحنا مكناش قاصدين نقتله احنا كنا عايزين نسرقه وساعتها احنا سلمنا المطواه والفرد الخرطوش والتليفونات للمباحث.

أستطرد المتهم في اعترافاته قائلا بأن فكرة سرقة سائق إن درايفر جت له عشان احنا الاتنين كانت حالتنا صعبة وممعناش فلوس وأنا مسئول عن عيلتي وابويا منفصل عن أمي ومتزوج ومخلف وعندي اخواتي وهما مسئولين مني وأنا اللي بصرف عليهم، وصديقي أحمد هو اللى اتصل وعمل الأوردر من شريحة لؤي نجم وده صاحبنا واحنا كان لينا عنده فلوس وعشان كده اخدنا منه التليفون.

أوضح المتهم أن المجني عليه لم يلحق مقاومتهما قائلا " ملحقش عشان أحمد قال للمجني عليه وقف العربية كذا مرة وراح المجني عليه قالوا حاضر وهو كان موجه السلاح الفرد الخرطوش في وشه لما المجني عليه موقفش راح أحمد عبد المنهم ضرب الطلقة من الفرد جت في الجنب اليمين للمجني عليه.

كشف المتهم عن حصوله على السلاح المستخدم من خلال صديقه أحمد عبد المنعم، قائلا" الحاجات دي كلها بتاعة أحمد عبد المنعم وأنا كنت أخذت منه السلاح الابيض المطواة وهو كان عنده السلاح الناري الفرد خرطوش علشان بيجامل بيه في الأفراح.

"الحوار الأخير"

ذكر المتهم أنه أول ما ركب السيارة ان درايفر معاه ركب قدام و احمد عبدالمنعم ركب ورا وانه طلع علبة السجاير من جيبه وعزم على الضحية ولكنه رفض وكان مشغل أغاني في كاسيت العربية وبعد شوية مشي في طريق غلط وساعتها قولناله إنت مشيت غلط وبعدها احمد عبدالمنعم عمر طلع السلاح الفرد خرطوش وقال له اقف اقف ووجه السلاح في وشه ولما المجني عليه ما سمعش الكلام وعافر وانا طلعت المطواة من جيبي وقولتله انزل انزل وبعد الطلقة ما طلعت من الفرد احنا زقيناه في الشارع وجرينا بالعربية بعد ما انا ركبت مكانه ومشيت بالعربية.