"كلام الزملكاوية صح".. خالد طلعت يثير الشكوك حول بطولات الأهلي

وجه خالد طلعت، الناقد الرياضي، رسالة هامة تحمل الكثير من الشكوك حول بطولات النادي الأهلي عبر تاريخه وذلك بعدما اقترب نادي بيراميدز من حصد بطولة الدوري للمرة الأولى في تاريخه.

وكتب خالد طلعت عبر حسابه الشخصي على فيسبوك: "الزملكاوية طول عمرهم بيرددوا كلام ان الدولة واتحاد الكرة والحكام بيساندوا الأهلي وان المساندة دي هي اللي خلت الأهلي يكسب بطولات كتيرة على مدار تاريخه مش بمجهوده".

وأضاف: "وطبعا الأهلاوية كانوا بيردوا وبيقولوا ان الكلام ده مش صح وان مستحيل نادي يفوز ببطولات بالمجاملة وان اي نادي يفوز ببطولات يبقى بمجهوده وان الزملكاوية بيقولوا كده عشان يعلقوا فشلهم على شماعة الظلم والتحكيم".

وتابع: "الغريب بقى ان فيه كتير من مسؤولي واعلامي وجماهير الأهلي بيرددوا نفس كلام الزملكاوية السنة دي وبيقولوا ان بيراميدز هياخد الدوري مجاملة من اتحاد الكورة والحكام وان الاهلي بيتظلم، والكلام ده خطير جدا لأنه بيضرب تاريخ الأهلي وبطولاته كلها في مقتل، خاصة وأن كلام الزملكاوية أكثر منطقية لان الاهلي هو الأولى بالمجاملة مش بيراميدز نظرا لتاريخه وشعبيته الكبيرة ونفوذه الكبير ومسؤوليه الكبار طول التاريخ".

وأوضح: "لأن لو الأهلاوية أقروا بان الدولة او الاتحاد او الحكام ممكن يظلموا نادي ويوجهوا بطولات لنادي تاني لأي سبب وانهم مقتنعين بكده فكده بيأكدوا كلام الزملكاوية اللي بيقولوه بقالهم أكتر من 100 سنة وبكده بيفتحوا الباب للتشكيك في كل بطولات الاهلي على مدار التاريخ بنفس الطريقة اللي بيشككوا بيها في الدوري السنة دي".

وأكمل: "الأهلاوية دلوقتي أمام طريق من اتنين مالهمش تالت ، يا الاقرار بان البطولات بتتاخد بالمجهود والتفوق والشطارة ومفيش بطولات بتتاخد بالمجاملات او التحكيم ، وبكده يبقى بيراميدز يستحق بطولة الدوري السنه دي لو اخدها ويبقى ده فشل من الاهلي نفسه، او الاقرار بان البطولات بتتحسم بالمجاملات والحكام وبكده يبقى بيأكدوا كلام الزملكاوية اللي بيقولوه بقالهم سنين طويلة وبيشككوا في كل بطولات الاهلي انه مخدهاش بمجهوده ومكانش يستحقها".

وفي سياق آخر، ويضرب نادي الزمالك موعدًا مع نادي بيراميدز في نهائي كأس مصر للمرة الثانية حيث التقى في نهائي كاس مصر 2018-2019 ونجح الزمالك في حصد الكأس بنتيجة ثلاثة أهداف نظيفة، لتشتعل الأجواء حول اللقاء المرتقب بين الزمالك وبيراميدز في نهائي كاس مصر.

وعبر جوزيه بيسيرو المدير الفني لنادي الزمالك عن سعادته الكبيرة بـ الوصول إلى نهائي كأس مصر في ظل التحديات والصعوبات التي تواجه الفريق في الآونة الأخيرة من أزمات مالية وبشرية ورغم ذلك تمكن من التأهل إلى نهائي الكأس أمام نادي بيراميدز.