بسبب جنازة سليمان عيد.. طه دسوقى يشن هجومًا واسعًا على الصحفيين
عبر الفنان طه دسوقي عن استياءه الشديد من التغطية الإعلامية للمناسبات التي تخص الفنانين وتجاوز الحدود الشخصية للفنان عبر هذه التغطية والتي ليس لها علاقة بعملهم في المجال الصحفي كتصوير الجنازات والأفراح، مما أثار جدلًا واسعًا على مواقع التواصل الاجتماعي، وأدى إلى وجود مؤيدين ومعارضين لهذا الرأي.
واستهل طه دسوقي حديثه بسؤال وجيه، إذ قال: «مجرد سؤال معروف ان الفنان أو العامل في مجال ال show business بيبقى شغله انه بيقدم محتوى وهو الوحيد اللي يقدر يتكلم عنه ويتسأل فيه ويتقبل النقد اللي عليه، فمفهوم وجود التغطية الإعلامية او التواجد الإعلامي في كل مراحل المحتوى ده، سواء اثناء تصويره أو أثناء عرضه او أي حاجة تخصه زي المهرجانات وحفلات التكريم والعروض الخاصة، من إمتى بقى أصبح الفنان كبني ادم هو نفسه محتوى؟».
طه دسوقي يشن هجومًا واسعًا على الصحفيين
وتابع حديثه: «يعني ليه فيه تغطية إعلامية ماشية مع الفنان ده في مناسباته الشخصية سواء بقى فرح أو عزا والأدهش حتى الدفنة!! وليه يبقى فيه محتوى عنوانه، شاهد فلان بيجوّز بنته.. فلان والدته توفت.. شاهد معازيم فرح فلان.. شاهد إنهيار الفنانة ليه والله؟ ليه شاهد الفنان وزوجته اثناء حضورهم فرح صديقه؟».
طه دسوقي: أيه السبق الصحفي في تصوير جنازة أو فرح
ويواصل الفنان الشاب طرح أسئلته فقال: «ايه المحتوى في بني آدم ماشي في الشارع مع مراته او بيحضروا مناسبة ملهاش اي علاقة بفن ؟ إيه الصحافة في تصوير واحد قاعد بيبكي على حد فقده مش قاعد بيصور مشهد مثلا؟ ايه السبق الصحفي في تصوير جثمان وليه أصلا تصوير جوه المقابر؟؟ طبعا مش كل حد رافع تليفونه بقى صحفي لأن الصحفيين المحترمين مبيعملوش كده».
طه دسوقي: لو واحد صورني في مناسبة وضربته كدا ابقى متحرش؟
وواصل طه دسوقي شن هجومه على الصحفيين وطرح سؤالًا آخر ألا وهو: «لو نزلت رفعت التليفون صورت واحد قاعد مع مراته على ترابيزة في مطعم هيقوم يكسر عضمك لأنك بالنسباله متحرش أو متطفل .. لكن لو اللي بيتصور ده فنان فاللي بيصوره -وارد يكون صحفي ياعم وانت راجل محبوب وسلم على جمهورك وإعملنا باي وانت بتاكل وقول لمراتك تعملنا باي كمان ولا انت مغرور ولا إيه ياعم من تواضع لله رفعه-
فسؤالي لأصحابي الصحفيين واساتذتي في مجال الصحافة والإعلام لما ابقى ماشي في الشارع او بحضر مناسبة ملهاش علاقة بالشغل والاقي حد بيصورني ڤيديو اتعامل معاه انه صحفي ولا متحرش؟»
مسلسل ولاد الشمس
ويذكر أن أخر مسلسل للفنان طه الدسوقي هو ولاد الشمس الذي عرض في دراما رمضان 2025، والذي شاركه في بطولته أحمد مالك، محمود حميدة، فرح يوسف، مريم الجندي، غادة طلعت، إخراج شادي عبدالسلام.