شريف إكرامي يعلّق على تصريحات حسام غالي: "المشهد محتاج عقل مش مزاج لحظي"

علق شريف إكرامي، حارس مرمى بيراميدز، على الجدل الذي أثارته تصريحات حسام غالي الأخيرة، والتي تحدث خلالها عن إمكانية توليه رئاسة النادي الأهلي مستقبلاً.

وكتب إكرامي عبر حسابه على منصة "إكس":"مشكلتنا إننا لسه بنتعامل مع النقد كأنه خيانة ومع الاختلاف في الرأي كأنه تهديد.. عندنا تطرف شديد في تصنيف الأمور يا أبيض يا أسود يا ملايكة يا شياطين.. نفس الشخص ممكن يبقى كادر ومستقبل النادي الصبح وخاين بالليل لمجرد إنه قال كلمة صادقة حتى لو في نظر البعض خانه التوقيت والتقدير".

وأضاف:"ده يورينا إن اللي بيحرك المشهد دلوقتي مش عقل ولا موضوعية، ده مزاج لحظي وانفعال أعمى والعقل مالوش مكان في الساحة أصلًا.. لأن في الحقيقة اللي بيحرك الصورة مش بس العواطف والانتماءات والارتباط بالأشخاص.. لكن كمان مصالح وصراعات خفية بتحدد مين يبقى بطل النهاردة ومتهم بكرة.. وسط كل ده، الجمهور بيتحوّل من شريك واعي لمجرد أداة بيتم اللعب بيها حسب المصلحة".

واختتم إكرامي:"الخلاصة إن المشهد محتاج عقل يوزن ويقود.. مش مزاج لحظي يغيّر الحقايق ولا مصالح خفية تتحكم في المصير".

وكان حسام غالي قد قال في تصريحات عبر أحد برامج البودكاست إنه يرى في نفسه إمكانية رئاسة الأهلي يومًا ما، لكنه لا يرغب حاليًا في خوض ما وصفه بـ"المعركة"، موضحًا أن دخوله مجال الإدارة جعله يرى الأمور بوضوح أكبر مما كان يراها كلاعب.