في مشاجرة زاوية دهشور.. المتهم: سوحها عليا مع مراتي الأولي ورحت اعاتبه لقيته في وضع مخل!!
حصل موقع خلف الحدث على نص التحقيقات في قضية مقتل صاحب مطعم فراخ مشوية على يد جاره عاشور عبد الغني تاجر الأدوات المنزلية بزاوية دهشور مركز البدرشين بالجيزة، بنشر اعترافات المتهم والتي نفى فيها قصده التخلص من المجني عليه، وأن الموضوع لا يعدو إلا أن يكون مشاجرة، لم يقصد فيها التخلص من الضحية.
تضمنت التحقيقات نفي المتهم عاشور عبد الغني 39 سنة تاجر أدوات منزلية قيامه بقتل المجني عليه عمدا مع سبق الإصرار وحيازة سلاح أبيض مطواة وأنكر قتله المجنى عليه عمداً وقرر ان الواقعة تمثلت في حدوث مشاجرة وتعدي بينه وبين المجنى عليه على اثرهم أخرج المجني عليه من بين طيات ملابسه سلاح أبيض "مطواة" وحاول التعدي عليه به فاشتبكا وتضاربا وفوجئ بالمجنى عليه غارقاً في دماؤه علي إثر إصابته بالمطواة ولم يدرك كيفية حدوث تلك الاصابة وبسؤاله عما اذا كان لديه شهود نفي خارج غرفة التحقيق للاستشهاد باي منهم او مدافعا يحضر معه اجراءات التحقيق فاجاب عن الشق الأول بالنفي وعن الشق الثاني بحضور محامي معه.
س: ما هو مؤهلك الدراسي ودرجة تعليمك وثقافتك؟
ج: انا معايا شهادة اعدادية وبقراً وبكتب بس مش اوي
س: وما هي وسيلة كسبك وتعايشك؟
ج: انا بشتغل مستاجر لمحل ادوات منزلية وكراسي وترابيزات وبفرش محلات وقهاوي باقساط ودخلي غير مستقر يعني شهر بكسب الفين جنيه صافي وشهر خمس الاف وشهر يزيد شوية وكله على حسب الشغل.
س: وما هي حالتك الاجتماعية؟
ج: انا متجوز اتنين واحدة اسمها بدرية والتانية اسمها داليا ودي متجوزها من ٤ أو ٥ سنين وعندي من الأولي ولد وبنتين ومعايا من الثانية بنت عمرها حوالي 3 او 4 سنين.
س: وما هو محل سكنك تحديدا؟
ج: انا كان عندي نصيب في بيت من ورث ابويا وكتبته باسم بدرية مراتي وعايشين فيه علي طول ومراتي الثانية داليا انا وهي كنا عايشين في بيت أمها بس امها متوفية وده بيت أمها.
س: وما طبيعة العلاقة بين زوجتيك ؟.
ج: الاتنين كانوا يعرفوا بعض من قبل كده ايام ما كنت متجوز بدرية بس ومكنش بينهم حاجة والعلاقة بينهم بقت وحشة وفيه مشاكل بينهم من بعد ما اتجوزت داليا بس مفيش مواجهة مباشرة بينهم وبين بعض.
س: وما هي طبيعة تلك الخلافات؟
ج: هي خلافات بسبب الغيرة لأني لما بروح لواحدة التانية بتدايق ولما اجيب لواحدة منهم حاجة والثانية لا وبتعرف بيحصل مشاكل مش اكتر من كدا بس مفيش مواجهة بتحصل بينهم وبين بعض وممكن توصل لانهم لو شافوا بعض في الشارع ممكن بدرية تتخانق مع داليا.
س: ومن اين تتحصل كل منهم عن معلوماتها بشأن الاخري؟
ج: ممكن الجيران تكون هي اللي بتحكي يعني ممكن جيران بدرية تروح تحكي لبدرية عن حاجة عني وعن داليا واني بجيبلها حاجة وانا داخل وممكن جيران داليا يحكولها عن اني ممكن اكون بجيب لبدرية حاجة وانا رايحلها وعبد التواب ماضي راح من عشر ايام قال لبدرية مراتي اني باخد حاجات من بيتها عبارة عن زيت وسكر ورز ووديتهم لمراتي التانية وده كان حصل فعلا.
س: وما هي المسافة التي تفصل بين محال سكن زوجتيك؟
ج: المسافة بين مراتاتي الاتنين حوالي ٥٠٠ متر.
س: وما هي طبيعة العلاقة بينك وبين زوجتيك؟
ج: بالنسبة لمراتي بدرية بينا مشاكل وبالنسبة لمراتي داليا مفيش بينا حاجة.
س: وما طبيعة المشكلات بينك وبين زوجتك بدرية؟
ج: مشاكل عشان ممكن اهتم بداليا اكثر وبجيب لداليا حاجات اكثر وبصرف علي داليا اكثر وبسيبها ساعات وببقي مع مراتي التانية.
س: وما هو مصدر تحصل زوجتك المدعوة بدرية علي تلك المعلومات ؟
ج: زي ما قولت قبل كده من الجيران او المعارف زي عبد التواب ماضي.
س: وما هو صلتك بالمجني عليه عبد التواب ماضي؟
ج: هو احنا جيران فى المنطقة واصحاب وعلاقتنا حلوه ببعض.
س: منذ متي وتلك العلاقة قائمة بينك وبين المجني عليه؟
ج: هو انا اعرف عبد التواب من حوالي ٢٥ سنة تقريبا
س: والي اي مدي كانت العلاقة بينك وبين المجنى عليه طيلة تلك الفترة؟
ج: هو طول الفترة دى كانت علاقتنا حلوة ببعض ومفيش اى مشاكل بينا خالص ای ظروف عندى يقف معايا واى ظرف عنده بقف معاه.
س: وهل كان المجنى عليه عبد التواب ماضي ذا صلة أو معرفة بأي من زوجتيك؟
ج: ايوة هو كان يعرف زوجتي بدرية وكان كل يوم بيكلمها مرتين من ييجي سنة ونص او سنتين ويعرف داليا شكليا بس مفيش تعامل بينهم .
س: وما هي طبيعة العلاقة بين المجني عليه وزوجتك بدرية ؟
ج: انا مراتي بدرية بتبيع خضار في محلها وعبد التواب فاتح مطعم فراخ وكفتة وحاجات زي كده وبيحتاج باستمرار كل يوم خضار وبيشتري منها شغل الخضار كله. س: هل كان يدور فيما بينهما حديث بشأنك؟
ج: مش عارف بس انا اخر حاجة عرفتها انه نقل لمراتي بدرية اني باخد من بيتها زيت وسكر ورز وتموين وبديه لمراتي داليا لكن اذا كان فيه كلام قبل كده بينهم عليا او كان بيتكلم عليا ولا لا دي معرفهاش.
س: متي واين نمي لعلمك تحدث المجنى عليه مع زوجتك بدرية في شأن خاص بك؟ ج: من عشر ايام تقريبا وده عرفته لما روحت بيت بدرية وعرفت منها .
س: وكيف وقفت على ذلك؟
ج: عرفت من بنتي الصغيرة اسمها ملك ودي سنها ١١ سنة وانا سألتها مين اللي قال لامك اني خدت حاجة وزيت وسكر من البيت وديتهم لمراتي التانية.
س: وما الذي دعاك اذا لسؤال نجلتك ملك بخصوص استيضاح هذا الشأن؟
ج: لان مراتي بدرية عرفت وعملتلي ليلة كبيرة وحصل مشكلة وانا كنت عايز اعرف هي عرفت منين.
س: وكيف اتصل علم المجنى عليه بهذا الشأن؟
ج: انا يومها عديت عليه في المحل والحاجة كانت معايا وقلتله اني انا واخدها من بيت بدرية ورايح بيها لمراتي داليا.
س: ما تفصيلات ما دار بينك وبين زوجتك بدرية في هذا الشأن ؟
ج: انا لقيتها بتسألني انت بتاخد حاجات من البيت هنا ليه وبتوديها البيت الثاني قولتلها انا حر ده بيتي ودي بطاقة تمويني والتموين ده حقي واعمل فيه اللي انا عاوزه قالتلي خلاص طالما هي كده يبقي متجيليش البيت ده تاني.
س: وما الذي ال اليه الخلاف بينك وبين زوجتك بدرية بخصوص هذا الشأن؟
ج: انا روحتلها بعد كده وهي بتبقي مقموصة وزعلانة عشان باخد من بيتها بدي لبيت داليا مراتي.
س: وهل كان المجني عليه هو المتسبب في ذلك الخلاف بينك وبين زوجتك بدرية؟ ج: ايوة كان هو السبب في المشكلة اللي حصلت بيني وبين بدرية.
س: ما الذي تبادر لذهنك بشأن تلك المشكلة عقب علمك بأن المجنى عليه هو مصدرها؟
ج: انا كنت عايز اعرف بس هوا ليه قال لمراتي كده وكنت عايز اعرف الدافع لكده وليه عمل بيني وبين مراتي المشكلة دي ورمي الكلمتين دول.
س: وما التصرف الذي بدر منك في سبيل ذلك؟
ج: كنت عايز اعاتبه واعرف منه ليه قال كده عليا لمراتي وسوحها عليا.
س: وما الفعل الذي قمت به لاستبيان سبب ذلك؟
ج: انا روحتله يوم الواقعة المحل بتاعه عشان اعاتبه واعرف منه وافهم ازاي عمل كده.
س: وما المدة الفاصلة بين ابلاغ المجنى عليه لزوجتك بدرية بمعلومات خاصة بك وبين علمك بكونه هو من أبلغها؟
ج: انا عرفت في نفس اليوم وده كان قبل خناقتنا بعشر ايام.
س: وما الذي دعاك اذا للانتظار طيلة تلك الفترة لمعاتبة المجنى عليه عما بدر منه؟ ج: انا مكنتش فاضي وكنت بروح الشغل في الجبل وبرجع متأخر ومش بشوفه .
س: وما الذي دعاك اذا لعدم معاتبته عن طريق مهاتفته؟
ج: انا كنت في الجبل ومش بيكون فيه شبكه هناك.
س: الم يتم التقابل بينك وبين المجني عليه طيلة تلك الفترة؟
ج: كنت بقابله من بعيد لبعيد وانا معدي بتوكتوك وكنت بشاور له عادي وبمشي علي طول بس موقفتش عشان اتكلم معاه في الحوار ده.
س: وماسبب ذلك اذا ؟
ج: عشان مكنتش ببقي فاضي ومعايا حاجات شغل طالع بيها الجبل عبارة عن اسطوانات هواء وحديد للناس بتشتغل عليها في الجبل فكنت بمشي علي طول وده مكنش وقت كلام.
س: سبق وان قررت بعملك تاجر ادوات منزلية وكراسي ومناضيد ما هي اذا صلتك بالعمل في الجبل وسبب صعودك اليه؟
ج: ولاد خالتي بيشدوا عربية فوق وفي الاسبوع ده كانوا عايزيني معاهم في الجبل وكنت بروحلهم
س: ما الذي اضمرته في نفسك بشأن المجني عليه علي اثر ما بدر منه من تصرف لم تستحسنه؟
ج: انا كنت هعاتبه مش اكتر ومكنتش ناوي اعمل معاه خناقة.
س: هل تحينت وقت مناسب لتلك المعاتبة؟
ج: انا كنت مستني ابقي فاضي واروح اعاتبه بس مكنش في دماغي خناقه ولما روحتله كنت شايف ان ده الوقت المناسب اللي اعاتبه فيه.
س: وهل من ثمة خلافات اخري بينك وبين المجنى عليه طيلة فترة علاقتك به بخلاف الخلاف الذي قام بينك وبين زوجتك بدرية بسببه؟
ج :لا هو طول الفترة دى مفتكرش انى عملت مشكلة معاه ولا هو عمل مشكلة معايا. س: واين تحديداً يقطن المجنى علية عبد التواب ماضي ؟
ج: هو ساكن في الشارع الى انا ساكن فيه عند بيت بدرية مراتي
س: وماهي المسافة الفاصلة بين محل سكنك ومحل سكن المجنى علية عبد التواب ماضي ؟
ج: هي تقريبا مسافه متعديش ۲۰ متر بين بيته وبين بدرية مراتي .
س: واين يقع الحانوت محل عمل المجنى عليه؟
ج: هو محله امام مدرسة الشهداء بزاوية دهشور وده بعيد عن بيت مراتي وهوا بيته بس اللي قريب لبيت مراتي.
س: وهل انت دائم التقابل والتردد على المجنى عليه عبد التواب بمسكنه او بالحانوت محل عمله ؟
ج: ايوة انا كنت بشوف عبد التواب تقريبا كل يوم وبنتقابل وكنا صحاب اوي وبنقعد مع بعض في المحل بتاعه.
س: وما هو تاريخ اخر تقابل بينك وبين المجنى عليه عبد التواب ماضي تحديداً ؟
جك انا اخر مره شفت فيها عبد التواب كان يوم التلات اول امبارح ۲۰۲۳/۲/۲۸ اللى حصل فية المشكلة بيني وبينه كان وقت العصر كده.
س: واين كان ذلك التقابل؟
ج: في المحل بتاعه امام مدرسة الشهداء واسمه محل ابوماضي.
س: هل كان ذلك التقابل بينك وبين المجني عليه بالحانوت خاصته بناء علي اتفاق مسبق؟
ج: لا مكنش بينا اتفاق اننا نتقابل.
س: وما سبب توجهك لمحل تواجد المجنى عليه بذلك المكان؟
ج: انا كنت رايح اعاتبه علي الموضوع اللي حصل بسببه المشكلة وانه حكي لمراتي علي حاجة خاصة بيا عملتلي مشكلة مع مراتي بدرية.
س: هل توجهت للحانوت الخاص بالمجني عليه من تلقاء نفسك وانت علم بتواجده فيه؟
ج: ايوة انا رايح وعارف انه هناك.
س: وكيف وقفت على ذلك؟
ج: لان ده ميعاد شغله بيشتغل من 8 الصبح لحد اذان العشاء واخوه بيروحله يستلم منه من العشاء لاخر الليل.
س: هل ايقنت تواجد المجنى عليه بمفرده بذلك الحانوت؟
ج: انا رايح علي اساس اني هلاقيه في المحل بس معرفش اذا كان معاه حد ولا لا وهوا ساعات بروحله وبيبقي فيه زباين وبقعد معاه
س: صف لنا ذلك الحانوت تحديداً؟
ج: هو مطعم اسمه ابو ماضي موجود ادام مدرسة زاوية دهشور في زاوية دهشور ومساحته مش هقدر احددها لكن هوا محل كبير وواخد ناصيتين وبيتكون من محل وملحق بيه اوضة والمحل فيه جريل بتاع سندوتشات وحواوشي وعربية كبده وفترينه لف اكل وشواية فراخ وشواية كهرباء وفيه اوضة مساحتها مش كبيرة اوي وفيها ترابيزات وكراسي وحوض وش.
س: هل تلك الغرفة الملحقة بالحانوت يؤمن غلقها؟
ج: لا دي مفتوحه علي المحل ومفيش ليها باب
س: هل يعمل لدي المجنى عليه عمال آخرين؟
ج: لا هوا شغال على طول في المحل لوحده بس ممكن يشتغل حد مع وردية باليل مع اخوه ياسر لكن الصبح بيكون شغال لوحده.
س: وما هي بادرة تخطيك للحانوت الخاص بالمجنى عليه للدلوف اليه ابان توجهك اليه ؟
ج: انا روحتله اليوم ده قبل العصر بشوية ودخلت المحل اول ما دخلت المحل ببص عليه حوالين الشواية والاجهزة في المحل نفسه ملقيتوش موجود فيها ودخلت علي الغرفة اللي في المحل لقيته فيها.
س: من كان برفقة المجنى عليه انذاك؟
ج: كان معاه واحدة ست منقبة.
س: صف لنا اوصاف تلك الفتاه حال مشاهدتك لها لأول وهلة؟
ج: هي شكلها مليانة شوية في الجسم ومش طويلة ولا قصيرة وكانت لابسه نقاب بس رافعاه ورافعة العباية.
س: هل وقفت علي شخص تلك الفتاه او لديك علم مسبق بشخصها؟
ج: معرفتهاش هي مين ولا كنت اعرفها.
س: هل تلك الفتاه علي علم مسبق بك وبشخصك او تعلم عنك اي معلومات؟
ج : لا هي متعرفنيش ولا انا اعرفها.
س: ما قولك فيما شهدت به المدعوة .ر بعلمها بشخصك وبإسم زوجتك المدعوة بدرية وعلمك بشخصها وسبق تقابلك بها؟
ج: الكلام ده محصلش.
س: وما هي كيفية اتصال علم سالفة الذكر بوجود زوجه لديك تدعي بدرية؟
ج: معرفش.
س: وما هي الحالة التي كانت عليها تلك الفتاه والمجنى عليه حال مشاهدتك لهم لأول وهلة ابان دلوفك للغرفة محل تواجدهم؟
ج: انا اول ما دخلت لقيت الست دي نايمة والمجني عليه معاها.
س: هل كان برفقة سالفي الذكر ثمة اشخاص آخرين؟
ج: لا كانوا لوحدهم.
س: ما التصرف الذي بدر من سالفي الذكر حال مشاهدتك لهم في تلك الوضعية؟
ج: البنت شدت نقابها وهدومها ولبستهم وهو شد بنطلونه ولبسه وزقني لبره وقالي اخرج برة بعد اذنك وخرجني بره الغرفة وخرج ورايا وساب البنت المنقبة تلبس.
س: ما التصرف الذي بدر منك حيال ذلك ؟
ج: انا خرجت عادي برة الاوضة ولا كان فيه حاجة.
س: وهل من ثمة حوار دار بينك وبين المجنى عليه انذاك؟
ج: انا قلتله ايه اللي انت بتعمله ده واحنا في ايام مفترجة وعلي العموم ده مش موضوعي انا جايلك في حاجة تانية ايه اللي انت عملته مع مراتي بدرية ده وانا مش هينفع اتكلم معاك دلوقتي عشان منعملش شوشرة وحوار ولقيت البت اللي كانت معاه خرجت من الباب الثاني قالي ماشي ياخويا بعدين نتكلم في الحوار ده .
س: وهل كان ذلك الحديث بينك وبين المجنى عليه بطريقة محتدمة؟
ج: لا كان كلام عادي من غير صوت عالي ولا زعيق.
س: ما التصرف الذي بدر منك عقب ذلك؟
ج: انا خدت بعضى وخرجت من المحل بتاعه.
س: ولاين كانت وجهتك ؟
ج: كنت رايح فرح بتاع بنت عمي كان في العزبة جمبنا.
س: وما الذي دعاك لمغادرة الحانوت الخاص بالمجنى عليه دون معاتبته واستبيان سبب تصرفه الذي لم تستحسنه رغم ان ذلك كان هو سبب ودافع توجهك اليه؟
ج: انا لقيت الجو فيه قلق عشان البت اللي كانت موجودة عنده والحوار اللي حصل ده ومكنتش عايز اعمل شوشرة.
س: هل حدث تشاجر او مشادة بينك وبين المجني عليه انذاك؟
ج: محصلش اى حاجة وقتها ما بيني وبينه.
س: هل وجهت للمجني عليه ثمة الفاظ تتضمن سباب او تهديد؟
ج: لا خالص
س: وما قولك فيما شهدت به المدعوة ر بتحقيقات النيابة العامة من انه حال دلوفك للحانوت محل عمل المجنى عليه وفي تواجدها قمت بسب المجنى عليه وتوجيه عده الفاظ اليه وتهديده وتوعده بالقتل والضرر علي اثر نقله معلومات خاصة بك لزوجتك؟ ج: لا الكلام ده محصلش انا ولا هددته ولا عملتله حاجة ولا شتمته.
س: وكيف اتصل علم المدعوة ر بقيام المجنى عليه بنقل اخبار ومعلومات تخص علاقتك بزوجتك داليا الي زوجتك بدرية ؟
ج: معرفش
س: لماذا لم تبقي رفقة المجني عليه لانهاء الخلاف القائم بينكم رغم كونك قررت ان الامر كله لا يعدوا كونك تريد معاتبته ليس اكثر ؟
ج: لاني لقيت الوضع مكنش مناسب عشان الوضع اللي شوفتهم فيه ده.
س: ومع من تقابلت فور خروجك من الحانوت خاصة المجني عليه؟
ج: انا ركبت التوك توك مع واحد اسمه احمد سعد عشان يوصلني الفرح اللي انا رايحه.
س: وما هي صلتك بسالف الذكر المدعو احمد سعد؟
ج: هو شغال معايا باخدو مشاوير ويحصلي فلوس من الناس وكده.
س: هل من ثمة خلافات بينك وبين المدعو احمد سعد ؟
ج: لا مفيش بينا اي حاجة.
س: وهل من ثمة علاقة بين المدعو احمد سعد والمجني عليه؟
ج: ايوة يعرفه بعض وعلاقتهم عادية بس مش صداقة قوية.
س: هل تقابلت مع المدعو احمد سعد مصادفة؟
ج: لا احنا كنا متفقين اننا هنتقابل قدام القهوة اللي بعد المحل وروحت ركبت معاه عشان يوديني الفرح.
س: ما الحالة التي كنت عليها حال دلوفك رفقة المدعو احمد سعد لتوصيلك لوجهتك؟ ج: انا كنت طبيعي جدا وعادي خالص بس لما ركبت جوه معاه سالني هوا فيه ايه قلتله لا مفيش حاجة ده المعلم معاه واحدة جوة راكبها.
س: هل كنت تتلفظ بثمة عبارات حال خروجك ومغادرتك او اثناء تواجدك بالحانوت محل عمل المبنى عليه انذاك؟
ج: لا محصلش خالص
س: وما قولك فيما شهد به المدعو احمد سعد بتحقيقات النيابة العامة من أنه ابصر وتناهي المسامعه قيامك بتوجيه السباب والشتم والنهر حال مغادرتك للحانوت محل عمل المجني عليه وقبيل دلوفك رفقته؟
ج: الكلام ده محصلش انا مشتمتش ولا حصل حاجة.
س: وما قولك ولم تتضمن شهادة سالف الذكر وجود اي اتفاق مسبق بينكم للتوجه الي عرس احدي قريباتك وعدم طلبك منه ذلك بعد استقلالك المركبة خاصته؟
ج: انا كنت متفق معاه انه هيوصلني الفرح وقبلها كان واقف معايا قبل ما ادخل المحل لعبد التواب
س: وما هو مقصدك عقب استقلالك المركبة رفقة المدعو احمد سعد ؟
ج: انا قلتله يطلع علي مكان الفرح بتاع بنت عمي في العزبة اللي بعدينا علي طول. س: وهل بلغت مقصدك؟
ج: لا موصلتش.
س: وما الذي حال دون ذلك؟
ج: لان احمد سعد قالي البت اللي كانت لابسه نقاب وخرجت من محل عبد التواب اهي واقفه مع ماهر ابو عقل في شارع وسط البلد.
س: وكيف نمي لعلم سالف الذكر ذلك؟
ج: لانه شاف الشارع ده وهوا ماشي بالتوكتوك.
س: وهل طلبت منه استمرار سيره لبلوغك مقصدك ؟
ج: لا انا طلبت منه يقف على اول شارع وسط البلد.
س: وما الذي دعاك اذا لتغيير وجهتك ؟
ج: لما لقيت البنت واقفة مع ماهر ابو عقل صاحبي نزلتلها عشان اروح اتكلم معاها. س: هل من سابق معرفة بينك وبين سالفة الذكر ليكون هناك حديث بينكما ؟
ج: لا
س: وما الذي دعاك اذا للتوقف خصيصا للتحدث معها رغم كونك ادعيت بعدم وجود أي صلة بينكم او سابق معرفة؟
ج: انا معرفش وقفتلها ليه هي جت معايا كده.
س: ما هي بادرة مشاهدتك لتلك الفتاه لأول وهلة ؟
ج: لما احمد سعد قاللي البت واقفة مع ماهر عقل اهي انا قلتله اقف هنا نزلت من التوكتوك انا واحمد مع بعض وشوفتها واقفة مع ماهر عقل ادام بيت ماهر وكان ماهر بيتكلم في التليفون وقومت انا داخل عليهم انا واحمد سعد.
س: وما سبب توجهك الى كل من سالفي الذكر ؟
ج: انا روحتلهم عشان اسالها واقفة مع ماهر عقل ليه وامشيها عشان متعملش شوشرة. س: وما طبيعة العلاقة بينك وبين المدعو ماهر عقل ؟
ج: هو صاحبي من الطفولة
س: وما طبيعة علاقتكم وهل من ثمة خلافات بينكم؟
ج: لا خالص.
س: ما الحوار الذي دار بينك وبين المدعو ماهر عقل والمدعوة ر حال تقابلك معهم؟ ج: انا دخلت عليهم واول ما دخلت عليهم لقيت البنت دي بتقول لماهر هما دول اللي بيجروا ورايا فلقيت ماهر بيقولي هوا فيه ايه فقولتله انا كنت عند عبد التواب دلوقتي ولقيتها هي وعبد التواب في وضع مخل في المحل.
س: هل كنت تلاحق تلك الفتاه او تقوم بمطاردتها؟
ج: لا انا وقفت بالصدفة لما احمد سعد قالي ان البت واقفة مع ماهر
س: وما الذي دعي تلك الفتاه المدعوة بالادلاء بتلك الاقوال للمدعو ماهر عقل بقيامكم بملاحقتها ؟
ج: هي عشان شايفانا واحنا داخلين عليهم .
س: وما هو قصدك من الادلاء بتلك الاقوال التي ادليتها امام المدعو ماهر عقل بشأن رؤيتك للمدعوة ر في وضع مخل للاداب رفقة المجنى عليه ؟
ج: هوا لما سالني انا رديت عليه وانا كنت رايح امشيها عشان متعملش شوشرة.
س: ما قصدك بلفظ شوشرة؟
ج اقصد ان الناس متتلمش وتعرف اللي حصل وانا مكنتش عايز اعملها هي وعبد التواب شوشرة ولا حد يعرف.
س وما قولك اذا وقد قررت بقيامك بفضح امر المدعوة ر والمجنى عليه عبد التواب لمن تقابلت معهم كلا من ١ احمد سعد ۲ ماهر عقل من مشاهدتك لسالفي الذكر في وضع مخل ؟
ج: انا معرفش بس هي جت معايا كده والاتنين صحابي.
س: هل قصدت ثمة منفعة جنسية من المدعوة ر او طلبت منها التوجه رفقتك؟
ج: لا مكنتش عايز منها حاجة كل اللي كنت عايزة انها تمشي ومتعملش شوشرة
س: ما تفصيلات ما دار بينك وبين من كانوا برفقتك تحديدا؟
ج: واحنا واقفين ادام بيت ماهر عقل انا واحمد سعد و ر وماهر عقل قام احمد سعد كشف النقاب عن وشها فقامت ضرباه بالقلم.
س: وما سبب قيام المدعو احمد سعد بالكشف عن وجه المدعوة ر ؟
ج: معرفش
س: وما التصرف الذي بدر منكم حيال ذلك؟
ج: ر قامت ضربة احمد سعد علي وشه بالقلم قام احمد سعد نزل فيها ضرب قامت هي من كتر الضرب وقعت في الارض.
س: وما سبب قيام المدعو احمد سعد بالتعدي علي المدعوة ر على نحو ما قررت؟
ج: عشان هي ضربته بالقلم لما كشف عن وشها.
س: وهل لحق بالمدعوة ر ثمة اصابات جراء ذلك التعدي؟
ج: لا متعورتش لانه كان بيضربها بايديه.
س: وما الذي حال دون تقدم سالفة الذكر للابلاغ عن تعرضها لذلك التعدي؟
ج: معرفش
س: هل حاولت فض ذلك التشاجر وانهاء ذلك التعدي؟
ج: لا محاولتش
س: وما هو دورك تحديدا في واقعة التعدي هذه ؟
ج: انا مكنش ليه دور انا وماهر في الضرب ده والموضوع ده واثناء الضرب ده لقيت عبد التواب و ماهر كان متصل بيه ومعرفه المكان اللي احنا فيه.
س وبناء علي طلب من اتصل المدعو ماهر عقل بالمجنى عليه عبد التواب ماضي لابلاغه بمحل تواجده؟
ج هي ر اللي طلبت من ماهر يتصل بيه.
س: وما سبب طلب تلك الفتاه من سالف الذكر ابلاغ المجنى عليه بمحل تواجدكم؟
ج: هي قالتله ان احنا بنطاردها.
س: جاء بحديثك طلب المدعوة ر من المدعو ماهر عقل التواصل مع المجنى عليه لابلاغه بمحل تواجدها لقيامكم بمطاردتها وهو ما يتنافي مع اقوالك من انك حال ابصارك للمدعوة ر رفقة المدعو ماهر عقل كان الاخير يتحدث في الهاتف مع المجنى عليه فما تعليلك اذا لذلك التعارض؟
ج: هوا احنا كنا ماشيين في الشارع عادي ومكناش بنطاردها وهي لما شافتنا جريت من نفسها وخافت مننا.
س: وما هي بادرة اعادة تقابلك بالمجنى عليه عبد التواب ماضي فور وصوله لمحل تواجدك والمدعو احمد سعد والمدعو ماهر عقل والمدعوة / ر ؟
ج : عبد التواب وصل لحظة ما كان احمد بيضرب ر راح عبد التواب شدني وزقني لورا وراح مسك في احمد سعد وراح ماهر قال لعبد التواب انت كده ولا شايفني ولا مقدرني ومش شايف غير نفسك.
س: هل والي المجنى عليه التعدي على المدعو احمد سعد ؟
ج: هوا زقه شوية وبعدها لف ليا انا كمان.
س: وهل احدث ايا من سالفي الذكر بالاخر ثمة اصابات؟
ج: لا محدش منهم عور الثاني خالص.
س: واين كانت تتواجد المدعوة ر في تلك الاثناء ؟
ج: هي الحريم اتلمت وقوموها من علي الارض وخدوها علي جمب.
س: واين كان يتواجد المدعو ماهر عقل تحديدا؟
ج: كان ماهر واقف في وسطنا.
س: هل ابصر كلا من المدعو احمد سعد والمدعو ماهر عقل والمدعوة ر كافة تفصيلات الواقعة؟
ج: ايوة شافوها كلها لحد ما عبد التواب مات.
س: جاء باقوالك انه حينما انتهي المجنى عليه من التشاجر مع المدعو أحمد سعد التفت اليك حدد لنا تفصيلات الحديث الذي دار بينكم؟
ج: اول ما عبد التواب لف وشه ليا قام مطلع مطواه من جنبه اليمين وقالي بقي انت بتعمل عليا فرده ده انا هطلع ... اهلك.
س: صف لنا تلك المطواة؟
ج: هي مطواة عاملة زي الاستانلس
س: من این استحصل المجني عليه على تلك المطواة؟
ج: هو عنده عدد كبير من السكاكين والمطاوي في المحل بتاعه.
س: هل اعتاد المجنى عليه حمل الاسلحة ؟
ج: ايوة هوا كان بيشيل مطاوي.
س: وما الغرض الذي كان يعد من اجله تلك الاسلحة؟
ج: معرفش.
س: هل قمت برد السب الواقع عليك من المجنى عليه اليه او حدث تشاجر او مشادة او تطور الامر بينكما انذاك؟
ج: هوا اول ما قالي الكلمتين دول ورفع عليا المطواة كان ماسكها بايده اليمين قومت انا ماسك ايده اليمين اللي فيها المطواة بايديا اليمين ولويتها والارض اللي كنا عليها مكنتش مستوية فوقعنا احنا الاتنين اتدحرجنا تلات مرات علي الارض وفجأة لقيت دم كتير نازل من عبد التواب وجسمه بيترعش.
س: وما طبيعة الارض محل حدوث ذلك التعدي ؟
ج كنا واقفين علي ارض طينية بس مش مستوية ومزلقان بادء من تحت لفوق.
س: وما سبب قيامك بالقبض علي يد المجني عليه حال اشهاره المطواة سالفة الوصف علي حد ماجاء بأقوالك؟
ج: عشان مكنتش عايز اسيبه يموتني وكنت عايز امنعه انه يتعدي عليا.
س: وكيف نمي لعلمك رغبته في قتلك؟
ج: اكيد هو مش مطلع المطواة عشان يهوشني بيها.
س: هل حدث بك اية اصابات جراء ذلك التشاجر ؟
ج: لا
س: وما هي الاصابات التي حدثت بالمجني عليه؟
ج: اللي انا شوفته انه خد نغزه في بطنه من الناحية الشمال تحت صدره.
س: وما الاداه التي تسببت في ذلك الجرح؟
ج: هي المطواة اللي كانت معاه .
س: وما هي كيفية حدوث اصابة المجني عليه؟
ج: لما مسكت ايد عبد التواب لما رفع عليا المطواة ولويت دراعه وقعنا أحنا الاتنين وحصلت اصابته.
س: وما موضعك ووجهتك بالنسبة للمجنى عليه حال حدوث ذلك التشاجر الذي نجم عنه اصابته؟
ج: احنا اتدحرجنا ثلاث مرات علي بعض علي الارض كنت انا ببقي فوق وهوا بيبقي تحت وانا ببقي تحت وهوا بيبقي فوق وهكذا.
س: وما الوضعية والوجهة التي انتهي عندها ذلك التشاجر ؟
ج: احنا انتهينا بأنه كان هوا تحتى وانا فوقه.
س: ومن كان يحوز تلك المطواة خلال ذلك التعدي؟
ج : المطواة كانت في ايد عبد التواب في الأول ولما انا مسكتها كان الجزء الحديد ايد عبد التواب عليه وانا ايدي فوق منه على طول وده حصل لحد الآخر.
س: وما هو طول نصل تلك المطواة وطول المقبض الخاص بها؟
ج: المطواة كلها بتاع حوالي عشرين سنتي ونصها النصل ونصها المقبض.
س: وما هو عرض نصل تلك المطواة؟
ج: هي بادءة من فوق خالص بنصل رفيع ونازلة علي واسع شوية بس مش عارف کام سم عرض النصل
س: هل لامست يدك نصل السلاح الابيض المذكور؟
ج: لا نا كنت ماسك فوق ايده علي طول بايده والمقبض مش ماسك النصل الحاد.
س: وما درجة حدية ذلك السلاح؟
ج: كانت حادة وشايفها بتلمع من فوق لتحت
س: هل استقر السلاح الموصوف بجسد المجني عليه؟
ج: معرفش بس هي مكانتش بايته في بطنه وسنه صغيرة في بطنه اللي كانت مفتوحه مكانتش كبيرة وانا سيبت كل حاجة وشيلت عبد الرحمن اول ما الدم نزل منه وجريت بيه بالتوكتوك بتاع احمد سعد طلعنا بيه علي مستشفي الرعاية الاسلامية .
س: ما الوقت الذي استغرقه ذلك التشاجر بينك وبين المجني عليه؟
ج: حوالي دقيقتين بالكتير يادوب مسكنا في بعض ووقعنا واتقلبنا تلات قلبات ومرة واحدة شوفت الدم.
س: هل كان بامكانك تحجيم او انهاء ذلك التشاجر والوقوف به عند حد معين؟
ج: انا مكنش في نيتي اي حاجة خالص انا كنت هقول كلمتين نخلص بيهم الموضوع وكل واحد يروح لحاله بس هو اللي رفع عليا المطواة وانا كنت ماسكه عشان خايف يموتني بيها.
س: هل تجيد استعمال الاسلحة البيضاء؟
ج: لا علي اد بس الشغل بتاعي لو بصلح كرسي او حاجة زي دي بستخدم فيها مطواة او شغل مش اكثر من كده.
س: معني ذلك اقرارك بحيازتك لمطاواه؟
ج: مش بشيل مطاوي وامشي بيها في الشارع بيبقي علي اد الشغل بس وممكن تبقي سكينة او مفك مش شرط مطواة.
س: وبم تفسر حدوث اصابة المجنى عليه؟
ج: أنا مش عارف كل ده حصل ازاي احنا لما وقعنا مرة واحدة انا فوقت علي ان عبد التواب غرقان في دمه.
س: ما هي الفترة الزمنية الفاصلة بين واقعة تقابلك بالمجنى عليه بالحانوت خاصته وبين اعادة تقابلك به وحدوث التشاجر بينكم والذي نتج عنه اصابته؟
ج: كلها ماخدتش عشر دقايق تقريبا
س: ومن القائم بنقل المجني عليه من محل حدوث الواقعة عقب اصابته؟
ج: انا خدته في التوكتوك بتاع احمد سعد روحنا بيه علي مستشفي الرعاية الاسلامية وقالولنا لازم يروح مستشفي البدرشين وروحنا المستشفي بالاسعاف ووقتها الناس قالولي اهل عبد التواب جايين لو شافوك هيموتوك وانا خدت بعضي وهربت.
س: ما الحالة التي وصل عليها المجني عليه لكل من مستشفى الرعاية الاسلامية ومستشفي البدرشين المركزي؟
ج: هو وصل مستشفي الرعاية كان بيتنفس بس كان بيطلع في الروح لان كان فيه صوت كانه حد بيشخط حاجة من جوة وروحه بتطلع وبيموت ومعرفش وصل مستشفي البدرشين عايش ولا ميت لاني مشيت.
س: هل اصابة المجني عليه السابق وصفها والتي حدثت له ابان تشاجركم على حد قولك هي التي اودت بحياته؟
ج: ايوة هو مات بسبب الاصابة دي.
س: هل تعمدت المساس بجسد المجنى عليه واصابته؟
ج: لا مكنش في نيتي ولا قصدي ولا انا عارف اصابته حصلت ازاي احنا وقعنا فوق بعض وحصل اللي حصل وهوا اتصاب ومش عارف اتصاب ازاي.
س: هل كان بامكانك مفاداة حدوث اصابة المجنى عليه والتي أودت بحياته؟
ج: لا مكنتش اقدر.
س: ما الذي حال دون ذلك؟
ج: عشان انا مكنتش اقصدها وانا معرفش اتعور ازاي ولا كنت قاصد اعوره.
س: وكيف نمي لعلمك وفاة المجني عليه؟
ج انا عرفت من ناس قرايبي كلمتهم قالولي انه مات.
س: ما التصرف الذي بدر منك حيال علمك بوفاته؟
ج: هربت فضلت راكب عربية تجاه المنصورة وموصلتش المنصورة وقبل المنصورة قعدت في كافيتيريا علي الطريق وبيت عندها للصبح وبعدها كلمت اتنين من البلد اسمهم الحاج محمد امبابي والثاني احمد ربيع هليل وقلتلهم ان انا عايز أسلم نفسي قالولي تعالي عشان الدنيا مقلوبة عليك وواخدين عيلتك.
س: وما هي كيفية ووقت ضبطك؟
ج: انا روحت المركز سلمت نفسي عشان محدش يتبهدل بسببي امبارح ۲۰۲۳/۳/۱ الساعة 3 العصر تقريبا.
س: هل وقفت علي صدور قرار من النيابة العامة بضبطك وعرضك؟
ج: لا مكنتش اعرف كل اللي اعرفه ان الحكومة عايزاني.
س: وهل من ثمة تفتيش انصرف لشخصك؟
ج: لا محدش فتشني ولا خد مني حاجة انا حجزوني وجابوني النهاردة النيابة.