طليقة مدرس الانجليزي: كان بخيل قوي وانفصلنا بعد أسبوعين وحاسبني على التورته
كان بخيل قوي، وفي مرة جاب تورتة وكلنا منها ولما رجع لقاها خلصت، فسألني عليها، وطالبني بثمنها 160 جنيه معتقدا أن أهلي حضروا في غيبته وهم من أكلوها، ولم استطع العيش معه، وعندما صممت على الطلاق طلقني بعد أسبوعين، بتلك الكلمات أدلت الزوجة الثانية لمدرس الانجليزي الذي عثر على جثته مقتولا داخل شقته بتفاصيل مثيرة حول حياته الشخصية.
استمع اشرف عشماوی وكيل النيابة لأقوال ياسمين 30 سنة ربة منزل
س: ما هي صلتك المتوفى الى رحمه مولاه تحديداً ؟
ج: المتوفى الى رحمه مولاه يبقى طليقي
س: ما تفصيلات حدوث وفاة المتوفى الى رحمه مولاه محمد سعد ؟
ج: انا معرفش هو مات ازاى انا جالى انهارده واحد جارنا يعرف ناس في الشارع اللى ساكن فيه محمد وجيه بلغنا بخبر وفاته
س: متي واين حدث ذلك ؟
ج: الكلام ده حصل النهارده ۲۰۲۲/۱۱/۲۲ الساعه حوالى ١:٠٠ م عند بيتي
س: و ما هي كيفيه تعارفك مع المتوفى الى رحمه مولاه ؟ 13
ج: كان في واحد عندنا في العماره و عارفه من المسجد عشان على طول بيصلى فيه, وجيه قال لوالدى انه جابليي عريس كويس و على طول بيصلى في الجامع, و هو جيه بعد الحوار ده يوميها بالليل جابوا من المسجد بعد صلاه العشاء و احنا مكناش عارفين انه جاي, و حصل تعارف بين والدى و بينه, وكان بيتكلم عن مراته الأولى وعن اخواته وكان وقتها بيتكلم كويس, ووالدى استريح ليه، و بعد القعده ديه, حصل خطوبه, بعدها بشهرين حصل الزواج
س: و متى تحديدا نشـأت علاقه الزوجية ؟
ج: ٢٠٢٢/٧/٢٤
س: وأين كان مسكن الزوجيه ؟
ج: انا مش عارفه اسم الشارع بس هو قدام الإسعاف ناحيه العشرين فيصل
س: وكيف كانت طبيعة العلاقة الزوجية القائمه فيما بينكما ؟
ج: هو بعد الجواز اتحول كان بخيل جدا و مش بيصرف خالص عليا وكان على طول بيتعصب عليا, و لو في مره عملت اكل و معجبوش كان يفضل ينكد عليا و يشتمنى.
س: و هل سبق لك الزواج قبل تلك الزيجة ؟
ج: لا, ديه كانت اول مره.
س: والى متى ظلت العلاقه الزوجيه قائمه ؟
ج: قعدنا حوالي أسبوعين متزوجين, و بعد كده سبت البيت و روحت بيت اهلى أسبوعين, و هو حاول الفتره ديه يرجعني بس انا مكنتش قادره ارجعله تانى, وجيه في الآخر بعد الأسبوعين دول طلقني .
س: و ما هو سبب طلبك للانفصال من المتوفى الى رحمه مولاه ؟
ج: هو كان بخيل جدا مكنش بيصرف عليا, وكان على طول بينتقد شكلى و بيقولى انتي شكلك وحش اوى بالنضاره، و لما كنت أوقع حاجه كان بيزعقلى جامد، حتى في مره كان هو جايب تورته، جيه سأل على باقي التورته، فقلتله معرفش قاللي مهو مفيش غير أهلك اللى اخدوها وطلب منى ١٦٠ ج ثمن التورته.
س: و هل كان ينفق عليك المتوفى الى رحمه مولاه ؟
ج: هو مكنش بينفق عليا تقريبا غير حاجات بسيطه وكنت لما بقوله انى محتاجه فلوس, كان على طول بيسألنى ليه, فساعات بقوله عشان اشحن و اكلم اهلى كان بيقولى مهما كده كده بيكلموكي و انا كده كده بجيب الأكل وكل حاجه .
س: و هل كان المتوفى الى رحمه مولاه مقتدر ؟
ج: انا معرفش مقتدر و لا لا بس هو كان ممشى البيت.
س: و هل قمت بطلب الطلاق من المتوفى الى رحمه مولاه آنذاك ؟
ج: ايوه
س: و هل وافق المتوفى الى رحمه مولاه على ذلك طلب ؟
ج: لا هو كان بيحاول يرجعنى وكان بيكلم اهلى عشان ارجعله بس انا مكنتش قادره لحد ما جيه بعد أسبوعين و طلقني
س: هل حدث ثمة خلافات فيما بينكما اثناء إجراءات الطلاق ؟
ج: لا, هو خلاني اخد حاجتي اللي كنت جايباها و مشيت عادي من البيت.
س: و هل قمتما بالتواصل عقب الانتهاء من إجراءات الطلاق ؟
ج: لا, انا بعد الطلاق عملت بلوك ليه في كل حاجه, و مكنتش اعرف اى حاجه عنه لحد النهارده لما عرفت انه اتوفى
س: ما هي طبيعة عمل المتوفى إلي رحمه مولاه محمد سعد؟
ج: هو شغال مدرس لغه انجليزيه في مدرسه العجوزه
س: و هل كنتى على علم بان المتوفى الى رحمه مولاه كان متزوجا من قبل وكان له من زوجته الأولى أولاد ؟
ج: ايوه انا عارفه انه كان متزوج قبل كده من كذا سنه.
س: و هل كان يزور أولاده في تلك الفتره ؟
ج: الفتره اللى انا عرفت فيها تقريبا مره واحده كان يوم جمعه
س: و ما هو سبب الانفصال عن زوجته الأولى ؟
ج: هو قاللى عشان هي كانت بتدخل اهلها في اى مشكله بينهم و مقدرش يستحمل و يكمل معاها و قال ان هي اللي خلعته.
س: و هل تزوج المتوفى الى رحمه مولاه عقب ذلك ؟
ج: انا عرفت بعد الطلاق انه كان كاتب على واحده بس مدخلش عليها
س: و ما هو سبب ذلك الانفصال مع زوجته الثانيه ؟
ج: انا معرفش ايه سبب الانفصال في المره الثانيه
س: هل كان المتوفي الى رحمة مولاه يعانى من أى أمراض عضوية أو عصبية ؟
ج: لا
س: هل كان يعاني من أي أمراض نفسية ؟
ج: لا هو مقاليش بس انا تصرفاته كانت صعبه جدا معايا, وكنت بحس ان عنده عقده نفسيه.
س: هل كان المتوفى الى رحمه مولاه يتعاطى ثمة مواد مخدره ؟
ج: لا
س: وهل سبق دخوله الى مستشفى للأمراض النفسية ؟
ج: لا
س: و هل كان يتردد على أطباء نفسيين ؟
ج: لا
س: هل كان المتوفى الى رحمة مولاه يعانى من اي اضطرابات سلوكية ؟
ج: لا هو كان عادى باستثناء انه على طول عصبي جدا.
س: و هل كان المتوفى الى رحمة مولاه يتلقى علاج نفسي ؟
ج: انا معرفش بصراحه
س: و هل كان المتوفى الى رحمه مولاه يتلقى علاج للادمان ؟
ج: لا .
س: هل حاول المجني عليه الإنتحار من قبل ؟
ج: لا
س: هل تحدث معك في رغبته في انهاء حياته ؟
ج: لا
س: هل من ثمة خلافات بين المتوفى إلي رحمه مولاه و احاد الناس ؟
ج: هو كان بيقوللى انه مقاطع اخواته بسبب ورث وكان بيقولى ان اخواته في السعوديه مش في مصر و من ساعه ما عرفته عمرى ما شوفته كلم اخواته, حتى في الزواج مجاش حد خالص غير زوج عمته بس انا مش عارفه اسمه . س: هل تشتبه جنائيا في وفاته ؟
ج: انا معرفش
س: هل تتهم أحدا بالتسبب في حدوث وفاته ؟
ج: لا انا معرفش اذا كان حد موته و لا انتحر و لا مات موتة ربنا.