المخرج السينمائي أحمد بدرخان للنيابة: باخد هيروين وتامول وكالنبام

ننفرد بنشر تحقيقات النيابة العامة مع المخرج السينمائي أحمد بدرخان، وصديقيه في قضية تعاطي الهيروين والصادر فيها حكما بمعاقبة كلا منهم بالحبس سنة مع الشغل والنفاذ وغرامة 20 ألف جنيه.

اعترف بدرخان، في التحقيقات التي باشرها عبد الهادي المليجي وكيل نيابة المطرية، بتعاطيه التامول وكالنبام، وأي منومات تساعده على النوم وبتعاطيه الهيروين على فترات متباعدة.

س: ما قولك فيما هو منسوب إليك من أنك متهم بإحراز وحيازة جوهر مخدر بقصد التعاطي في غير الأحوال المصرح بها قانونا؟
ج: محصلش

س: ما قولك فيما هو منسوب إليك من أنك متهم بإحراز وحيازة أقراص مخدرة بقصد التعاطي في غير الأحوال المصرح بها قانونا ؟
ج: محصلش

س: ما هي ظروف ضبطك وإحضارك وعرضك علينا ؟
ج: اللى حصل إمبارح 7-3-2023 الساعة 5 المغرب، كنت مع أحمد حسن وكريم اصحابي بالعربية بتاعت أحمد وخارجين من الشيخ زايد واتجهنا للحرفيين في السلام عشان نبيع فوانيس العربية بتاعت أحمد حسن، وخلصنا في السلام وتوهنا في جسر السويس، وحضنا على جنب وكريم كان قاعد ورا ونزل من العربية يسأل حد احنا فين ويعرف منه الطريق المضبوط، وفي اللحظة دي يدوب، واحنا واقفين لقينا ميكروباص بيكسر على العربية ونزل منه أربع أو خمس ضباط لابسين ملكي وهجموا علينا بعنف، وقبضوا علينا ومسابوش فرصة لينا نتكلم وفتشونا وملقوش معانا أي ممنوعات وخدونا على القسم وجينا على النيابة وكنت عرفت في القسم إنهم هيلفقوا لينا قضية مخدرات وحتى الضابط اللي عمل محضر ضربني وأحدث إصابتي في عيني الشمال وعمل جرح في صدري.
س: متى وأين حدث ذلك ؟

ج: الكلام ده حصل بتاريخ 7/3/2023 الساعة 5 المغرب في جسر السويس ومعرفش فين بالضبط لأننا كنا تايهين.
س: وما سبب ومناسبة تواجدك بالزمان والمكان سالفي الذكر؟
ج: احنا كنا راجعين من الحرفيين في السلام ومتجهين للشيخ زايد من شارع جسر السويس وكنا تايهين وخدونا في المكان اللى كنا واقفين فيه تايهين.
س: ومن كان برفقتك آنذاك ؟
ج: أحمد حسن وكريم أصحابي اللى مقبوض عليهم معايا.
س: ما طبيعة علاقتك بسالفي الذكر ؟
ج: هما اصحاب أخويا الصغير وأحمد حسن عنده عربية كرايزلر وأنا كان عندي نفس العربية وخدته نروح نبيع له الفانوس.
س: من القائم على ضبطك تحديدا ؟.
ج:  خمسة مش عارف أسماؤهم بالضبط.

س: ما سبب ضبطك تحديدا ؟

ج: معرفش وما قالوش أي حاجه.

س: هل دار فيما بينكما ثمة حوار ؟
ج: لا مسابوش ليا فرصة .
س: هل من ثمة تفتيش وقع على شخصك ؟
ج: أيوه فتشوني.
س: وما الذي أسفر عنه ذلك التفتيش ؟
ج:كان معايا 4850 جنيه والهاتفين بتوعي بس.
س: ما هي صلتك بالمضبوطات السابق عرضها عليك ؟

ج: أنا معرفش عنها حاجه الفلوس والتليفونات اللي بتوعي.

س: ما تعليلك لعرضها رفقتك الآن ؟

ج: معرفش هو عمل كده ليه.

س: هل توجد ثمة علاقة أو خلافات فيما بينك وبين النقيب محمد شوقي؟
ج: معرفوش.

س: ما قولك فيما أثبته النقيب محمد شوقي بمحضره  المؤرخ في 7/3/2023 الساعة 7.30 مساء والثابت به؟.. تلوناه عليه تفصليا.

ج: محصلش.

س: ما تعليلك لذلك ؟

ج: معرفش.

س: هل تتعاطى أية مواد مخدرة ؟

ج: أيوة بتعاطى تامول وباخد كالنبام وأي منومات تساعدني على النوم وباخد هيروين بس مش متواصل.
س: هل توافق في عرضك على مصلحة الطب الشرعي وأخذ عينتي بول ودماء؟.

ج: أيوه وهياكدوا كلام.

س: ملك من تلك السيارة المضبوطة ؟

ج: هي ملك أحمد محمد حسن عبد العال.

س: هل لديك سوابق مماثلة ؟.
ج: لا

س: هل لديك سوابق أخرى ؟

ج:لا

س: أنت متهم بإحراز وحيازة جوهر مخدر بقصد التعاطي في غير الأحوال المصرح بها قانونا ؟
ج: محصلش.

س: أنت متهم بإحراز وحيازة أقراص مخدرة بقصد التعاطي في غير الأحوال المصرح بها قانونا ؟

ج:محصلش.

س: هل لديك أقوال أخرى ؟
ج: لا