الشحات مبروك يكشف قصة الدعاء والصبر بعد 11 سنة انتظار لإنجاب أولاده

 روى كابتن الشحات مبروك في حوار صادق ومؤثر لبرنامج كلم ربنا على الراديو9090، تجربته الشخصية مع الصبر والدعاء، بعد 11 سنة من الانتظار قبل أن يحمل زوجته.

قال الشحات: «قعدت 11 سنة مبخلفش، ونفسي في عيل أنا وزوجتي، واللي كانت حالتها النفسية صعبة.

 كل اللي يعرف كده كانوا يقولوا لي: ادعي ربنا كتير، وأنا دايمًا أقولهم: ربنا عارف اللي جوايا إزاي، وأنا بطلب منه وهو أعلم بحالي».

وأضاف: «وفي يوم من الأيام وفجأة بعد 11 سنة انتظار، زوجتي حملت. 

يوم الولادة كان يوم جمعة، جريت على المسجد أصلي الجمعة وادعي ربنا الولادة تكون سهلة. 

صديقي كان معايا، قال لي: أنت صليت ركعة واحدة من كثر الفرحة، وكنت مش حاسس بأي حاجة وفضلت أكلم ربنا وأقول له: أنا مش هعرف أشكرك ولا أقول كلام مترتب زي الناس، بس ليا طلب واحد أن مراتي والمولود يقوموا سالمين، متزعلنيش فيهم».

وأكد الشحات أن تجربته علمته الصبر والرضا بقضاء الله: «ربنا عمره ما زعلني وعمري ما كلمته إلا بقلبي.. هو عارف سري، عشان كده استجاب للسر اللي جوايا. 

عندي أولادي دلوقتي وهم كل حياتي، وطول حياتي ربنا بيفرحني على قدي ويزعقلني على قدي برده. 

عمره ما زعلني زعل كبير أنا مش أقدر عليه، ولا فرحني فرح كبير».

واختتم حديثه قائلاً: «أنا دايمًا مطمئن ومتأكد إنه عارف كل اللي جوايا، وأصلي مع ربنا بكل قلبي، وراضي بكل اللي ربنا بيبعته ليا. أنا تايه مع الله، وهو شايفني طول الوقت».