شقيق الفنانة رنا رئيس أمام النيابة: الدولارات بتاعتي.. والحشيش والممنوعات مش تبعي

كشفت تحقيقات النيابة العامة تفاصيل مثيرة حول ملابسات القبض على عبد الله عماد رئيس، طالب الإعلام وشقيق فنانة معروفة، بعدما تم ضبطه وبحوزته مواد يُشتبه في كونها مخدرة وأدوات أخرى. وخلال التحقيقات، أنكر المتهم صلته بالمضبوطات، مؤكدًا أنها لا تخصه، ومقدمًا رواية مغايرة لكيفية العثور عليها، في وقت تواصل فيه النيابة فحص الأدلة وسماع الشهود لكشف حقيقة الواقعة، وذلك في حضور محاميه أحمد غنيمة.

قال الطالب عبد الله عماد رئيس، 22 سنة، طالب بكلية الإعلام بالأكاديمية العربية للعلوم والتكنولوجيا والنقل البحري، في تحقيقات نيابة الشيخ زايد التي باشرها محمود غراب وكيل النائب العام، برئاسة المستشار أحمد أسامة رئيس النيابة:

س: ما قولك فيما هو منسوب إليك من اتهامات؟
ج: محصلش، أنا مش بشرب مخدرات، والمضبوطات اللي اتعرضت عليّ كلها مش بتاعتي، غير الـ100 دولار بس، دول بتوعي وجزء من مصاريف الجامعة.

س: أخبرنا عن ظروف ضبطك؟
ج: أنا اسمي عبد الله عماد رئيس، طالب في كلية الإعلام بالأكاديمية البحرية بالقرية الذكية، في الفرقة الرابعة، وتقديري مقبول وأحيانًا جيد. والدتي اسمها زينب محمد حسن دسوقي. عندي إخوات، منهم رنا رئيس وهي ممثلة، وأخت تانية اسمها منة رئيس. وعندي إخوات من والدي - الله يرحمه - من زوجة أخرى اسمها رنا، وخلف منها 3 أولاد: عمر وآسر وحمزة. إحنا أسرة متوسطة ومحترمة.

اللي حصل إن النهارده قبل الفطار في نهار رمضان، الساعة 2:15 ظهرًا، كنت راجع من الجامعة أنا وأصحابي يوسف، مصطفى، سقا، ورفاعي. وكانت المشكلة إن اللوحات المعدنية الخلفية للعربية كانت واقعة من يومين، وملحقتش أعمل محضر فقد أو أطلع بدل فاقد.

وأثناء سيري في منطقة بيفرلي هيلز، الضابط أول ما شاف العربية من غير لوحات خلفية وقفنا، وبدأ يفتشني، وطلع من محفظتي مبلغ 100 دولار. وبعدها فوجئنا بالضابط بيطلع من تحت العربية شنطة كروس سوداء، طلع منها قطعتين حشيش صغيرين، وزجاجة خمرة، ومطواة قرن غزال، وعبوة سيلف ديفنس. وأنا قلت له الحاجات دي مش بتاعتي، لكنه ما صدقنيش، وخدني على القسم، وبعدها عرضني على النيابة، ومش عارف ليه ما أخدش أصحابي اللي كانوا معايا.

س: متى جرى ضبطك؟
ج: اتقبض عليّ النهارده الساعة 2:15 بعد الظهر.

س: أين مكان ضبطك تحديدًا؟
ج: في بيفرلي هيلز، بجوار سوبر ماركت المختار.

س: من كان برفقتك؟
ج: كان معايا زمايلي في الجامعة: يوسف، رفاعي، مصطفى، وسقا.

س: اذكر البيانات الكاملة لمرافقيك؟
ج: أنا معرفش أساميهم بالكامل، أعرفهم بالأسماء دي بس، وهم زمايلي في الجامعة.

س: ما مدى إمكانية حضورهم للشهادة؟
ج: مش هيقدروا يجوا، ومش هقدر أجيبهم.

س: لمن تعود السيارة؟
ج: العربية بتاعتي، لكنها مسجلة باسم والدتي زينب، في مرور 6 أكتوبر.

س: صف حالة السيارة قبل الضبط؟
ج: اللوحات الخلفية كانت واقعة من يومين بسبب خبطه من الخلف، وضاعت، وملحقتش أعمل محضر فقد.

س: من كان يقود السيارة وقت الضبط؟
ج: في الأول أنا، وبعد كده كان صاحبي رفاعي هو اللي سايق.

س: هناك تناقض في أقوالك بشأن قائد السيارة؟
ج: كنت تعبان ومرهق لأني صاحي بدري للجامعة.

س: لماذا تركت القيادة لصديقك؟
ج: علشان كنت عايز أرتاح وأنام شوية.

س: أين كان موضع جلوسكم؟
ج: أنا كنت قاعد في الكرسي الأمامي بجوار السائق، ورفاعي كان سايق، ويوسف ومصطفى وسقا كانوا في الخلف.

س: من قام بضبطك؟
ج: الشرطة، كان في ضابط و3 أمناء شرطة.

س: ماذا كانوا يرتدون؟
ج: كانوا لابسين ملابس مدنية.

س: صف الحوار الذي دار بينك وبين الضابط؟
ج: حصلت مشادة كلامية بيني وبين الضابط اسمه محمود، لأني اعترضت على القبض عليّ، فقال: "ركبوه العربية، أنا مش عايز أي حد يتكلم هنا".

س: من قام بتفتيشك؟
ج: الضابط نفسه.

س: ماذا أسفر التفتيش؟
ج: محفظتي وتليفوني فقط، نوعه iPhone 11 Pro Max، وعليه شريحة رقم 00783.

س: كيف تم اقتيادك للقسم؟
ج: في سيارة الشرطة، وبعدها تم عرضي على النيابة.

س: ما صلتك بالمضبوطات؟
ج: مفيش أي صلة، غير الـ100 دولار بس.

س: صف رؤيتك للمضبوطات؟
ج: شفت الضابط بيطلع شنطة سوداء من تحت العربية، وحد حطها هناك، وطلع منها الحشيش والمطواة وعبوة السيلف ديفنس وزجاجة الخمر.

س: ما ردك على محضر الضبط؟
ج: غير صحيح، ومعرفش الضابط كتب كده ليه.

س: هل توافق على إجراء تحليل مخدرات؟
ج: أيوه موافق، عشان أثبت إني مش بتعاطى.

س: هل توجد كاميرات بالمكان؟
ج: أيوه، في كاميرات كتير، زي سوبر ماركت المختار، ومحل كشري الحوت، ومحل موبايلات قريب، وكلها هتثبت كلامي.

س: ما اسم شهرتك؟
ج: بيقولولي "دودز" أو "بودز".

س: هل لديك سوابق جنائية؟
ج: لا، مليش أي سوابق.

س: ما ردك على اتهامك بإحراز مخدر بقصد التعاطي؟
ج: أنكر، ومش بشرب مخدرات.

س: ما ردك على اتهامك بإحراز سلاح أبيض؟
ج: أنكر، والمطواة مش بتاعتي.

س: ما ردك على إحراز عبوة "Self Defense"؟
ج: مش بتاعتي، وشوفتها قبل كده بس.

س: ما ردك على اتهامك بالقيادة تحت تأثير المخدر؟
ج: محصلش، أنا مش بتعاطى مخدرات ولا بشرب خمور.