في لحظة، ممكن يسقط نجم كبير… مش بسبب عمل فني سيئ، ولا تصريح غريب… لكن بسبب "نظرة" فيها استعلاء، أو "سلام" اتمنع عن اتنين شباب بسطاء، واقفين بكل حب واحترام، مستنيين يسلموا على فنان بيحبوه من سنين.
الفنان المعروف نجم تلفزيوني كبير، كبر في عينينا بأعماله، لكن للأسف صغُر جدًا في موقف.
في نفس اللحظة اللي رفض فيها يسلم على شباب من الناس العاديين دخل الحفلة يسلم ويحضن ويُقبّل فنانين زيه.
ليه؟
هل السلام على الجمهور البسيط بينقص من قيمتك؟
هل البوسة لناس معينه بس للي في الصف الأول وجمهورك عنده جرب أو أمراض معديه وبيوسخوا البدله ؟
أنا شايفة إن ده التعالي اللي يعتبر بداية السقوط
ومهما كان تاريخك الفني، الناس اللي شالتك فوق تقدر تنزلك بلحظة.
الفن الحقيقي مش تمثيل
الفن الحقيقي تواضع، و"نَفَس طيب" مع الناس، خاصة البسطاء اللي حبّوك من غير ما يعرفوك شخصيًا.
وده موقف بالنسبة لي أسقط فنان، وأسقط احترام سنين.