أنهى حياة عجوز وسرقها ليسدد مصاريف المأون ويعيد زوجته..المؤبد لمبيض محارة!
كانت تثق به، تسمح له بالدخول إلى منزلها، بل تمنحه أحيانًا بعض أموالها عن طيب خاطر. لم تتخيل أن من كان يقرأ لها القرآن سيكون قاتلها يومًا ما! في لحظة ضعف وخيانة، قرر أن يخون العشرة ويكتم أنفاسها للأبد… فقط من أجل المال!
قضت محكمة جنايات الجيزة، بمعاقبة محمد أمري 27 سنة مبيض محارة بامبابة بالسجن المؤبد، لقيامه بقتل ربة منزل وسرقتها، ومعاقبة محمود حميدة صاحب محل مجوهرات بأوسيم بالحبس مع الشغل ستة أشهر لقيامه باخفاء أشياء مسروقة.
صدر الحكم برئاسة المستشار دكتور حسن السيد وعضوية المستشارين خالد عمار وخالد رشاد، بحضور خالد شحاته وكيل النيابة بأمانة سر محمد شعراوي.
أحال المستشار أمير فتحي القائم بأعمال المحامي لنيابة شمال الجيزة، لأنهما في يوم ٢١/ ٢ / ٢٠٢٣ بدائرة قسم شرطة إمبابة محافظة الجيزة.
- المتهم الأول قتل المجني عليها ناهد محمد عبد المجيد عمدًا مع سبق الإصرار بأن بيت النية وعقد العزم على إزهاق روحها، فتوجه إلى مسكنها وما أن ظفر بها حتى أجهز عليها كاتمًا أنفاسها قاصدًا قتلا فأحدث إصابتها الموصوفة بتقرير الصفة التشريحية والتي أودت بحياتها. وقد ارتبطت تلك الجناية بجنحة بأنه في ذات الزمان والمكان سالفي الذكر سرق المنقولات المبينة وصفا وقيمة والمملوكة للمجني عليها ناهد محمد عبد المجيد وكان ذلك من داخل مسكنها على النحو المبين بالتحقيقات.
المتهم الثاني، أخفي الأشياء المسروقة محل الإتهام السابق مع علمه بكونها متحصلة من جنحة سرقة على النحو المبين بالتحقيقات.
البداية
عندما علم اللواء هشام أبو عوف بوفاة شقيقة والدته المجني عليها بمسكنها، وباستبيان الأمر لم يشتبه جنائيا في وفاتها، فقام بإحضار مفتش الصحة واستخراج تصريح دفنها، وعقب ذلك اكتشف سرقة هاتفها المحمول فاشتبه جنائيا في وفاتها وأبلغ الشرطة، لتتوصل تحريات المقدم مؤمن فرج رئيس مباحث إمبابة سابقا على وجود شبهة جنائية وأن المتهم وراء ارتكاب الواقعة، فسطر محضر تحرياته واستصدر إذنا من النيابة العامة، ونفاذا لذلك الإذن ضبط المتهم وبمواجهته أقر له بارتكاب واقعة قتل المجني علها نظرًا لتردي حالته المادية عقد العزم وبيت النية على إزهاق روحها وما أن ظفر بها حتى أجهز عليها كاتمًا أنفاسها قاصدًا قتلا محدثا بها الإصابات الموصوفة بتقرير الصفة التشريحية والتي أودت بحياتها وعقب ذلك استولي علي المنقولات المملوكة لها وتوجه إلى المتهم الثاني وباعها له وأضاف أن تحرياته توصلت إلى كون المتهم الثاني على علم من كونه المنقولات متحصلة من جناية فضبطه.
اعتراف المتهم بانهاء حياة العجوز
اعترف المتهم في التحقيقات اتي باشرها محمد طارق وكيل نيابة إمبابة قائلا" اللي حصل إن أنا عرفت مدام ناهد الله يرحمها من حوالي خمس شهور عن طريق واحد اسمه محمد صلاح علشان ده الكهربائي بتاعها وقاللى ان مدام ناهد كبيرة في السن وتعبانه وعضمها بيوجعها وعلشان انا حافظ قرآن وبقعد اقرأ قرآن على الناس و محمد صلاح عارف كدا عرفنى على مدام ناهد وعرفها عليه ولقيتها مره بتكلمني في التليفون علشان اروح لها الشقه بتاعتها اللى فى عمارات الأوقاف بشارع السودان في إمبابة ورحت لها هناك حوالى خمسة مرات علشان اساعدها في شغل البيت وأقرئلها قرآن علشان هيه ست كبيرة وفي مره منهم طلبت منها ان اخذ السلسه الذهب بتاعتها علشان اقرأ عليها قرآن في البيت علشان تخف وفعلا عملت كدا وبعد كدا رحت مرجعلها السلسلة تاني والكلام ده كان من حوالي شهرين وفى نفس اليوم اللي رجعت فيه السلسلة سرقت منها انسيال واثنين خاتم ذهب وهيه محستش ورحت رايح بيعهم لواحد اسمه محمود محروس متولی صاحب محل ذهب في بشتيل بحوالي 11 الف جنيه وساعتها مدام ناهد الله يرحمها عرفت في نفس اليوم ان انا سرقتها وراحت كلمتنى فى التليفون وراحت مكلمه محمد صلاح اللي عرفنى عليها وقالتله اني سرقتها وانا ساعتها كنت مزنوق في فلوس بس مكنش يرضيني ان اظهر قدام محمد صلاح ان انا حرامی رحت واخذ بعضى انا وابويا اللي اسمه امری ثابت ساعتها ورايحين لمدام ناهد وادتلها الفلوس ثمن الحاجه اللى سرقتها وساعتها هيه قالتلي ان انا مسمحاك علشان خاطر ابوك بس متجيش هنا تانى وبعدين انا اتزنقت في فلوس الفتره الاخيره ومكنتش عارف اعمل ايه علشان كان فيه خلافات بيني و بين مراتى وكنت محتاج الفين جنيه ضرورى علشان أردها عند المأذون ففكرت إنی أروح أسرق مدام ناهد تاني فرحت واخذ بعضى يوم ۲۰۲۳/۲/۲۱ ورايح على بيت مدام ناهد ورحت مخبط عليها باب الشقة وراحت سألت مين اللى على الباب فأنا خفت و مردتش راحت هيه فتحت باب الشقة ولقيت نفسى بزقها ايدى في صدرها راحت وقعت على الأرض وراحت قالتلى انتا جيت تاني ليه يا محمد فأنا خفت لحسن تصرخ رحت كاتم نفسها بأيدى على بقها ومنخيرها وهيه ساعتها قطعت النفس فأنا قلت هيه اغمى عليها، ورحت داخل اوضتها لقيت تليفون موجود على المكتب رحت واخده وأنا طاعل رحت مقلعها فردة حلق من اللي كانت لابساها واخدت السلسلة اللي هيا لبساها ورحت قافل باب الشقة ورحت في نفس اليوم على محل الكينج بتاع التليفونات بتاع واحد اسمه عبد الرحمن مغاوري بعته بحوالي 1900 جنيه وبعديها بكام يوم يوم الجمعة 24 فبراير 2023 رحت لمحل ذهب اللي بعت فيه الذهب المرة الأولى ورحت بايع له فردة الحلق اللي سرقتها بمبلغ 620 جنيه وخليت السلسلة معايا في بتي وأنا سرقتها عشان أنا مزنوق في فلوس عشان أرد مراتي ومكنش قصدى اقتلها ويوم السبت الصبح الموافق ٢٠٢٣/٢/٢٥ لقيت الحكومة جيالي البيت وراحوا وخدني وأنا قلتلهم هقول على كل حاجه وساعتها قلتلهم على مكان التليفون ومحل التليفونات اللي بعت فيه التليفون ومحل المجوهرات اللى بعت فيه الحلق وادتهم السلسلة اللى كانت معايا في البيت والنهارده لقيتهم عرضوني على النيابة وده كل اللي حصل.
